Олоҥхо ыһыаҕын үс күннээх, икки түүннээх күрэхтэһиилэрэ Нерюнгри куоратын Таастаах хайатын үрдүгэр тутуллубут «Амикан» этнокомплексыгар түмүктэннилэр.

Олоҥхону биирдиилээн толорууга 35 сааһыгар диэри саастаах ыччат дьоҥҥо I үрдэл Бүлүү улууһун Тааһаҕарыттан Сайыына Шамаева буолла. Бирииһэ  – 50 тыһ. солк. Кини Ийэ олоҥхоһут Маргарита Григорьева сиэнэ. Тастыҥ балта Нарыйа Шамаева бу күрэххэ эмиэ кытынна, анал аатынан бэлиэтэннэ. Кыргыттар иккиэн устудьуоннар: Сайыына — ХИФУ, Нарыйа — АГИКИ.

II үрдэл – Айталын Винокуров – 40 тыһ. солк.

III үрдэл – Никита Аянитов – 30 тыһ. солк. Никитаны «Саҥа күн» биэрии ыытааччытын быһыытынан үксүгүт билэр. ХИФУ устудьуона, Үөһээ Бүлүүттэн төрүттээх.

Гран-при аатын Мэҥэ Хаҥаластан Станислав Иванов ылла уонна 300 тыһыынча солкуобай харчынан бириэмийэни тутар чиэскэ тигистэ.



 Станислав Иванов — “Олоҥхо-баттл” телевизионнай күрэх муҥутуур кыайыылааҕа, оһуохайга “Аан Дархан этээччи” үрдүк аат хаһаайына. Кини Мэҥэ Хаҥалас култуураҕа салалтатыгар исписэлииһинэн үлэлиир. Бүлүү улууһун Тааһаҕар нэһилиэгиттэн төрүттээх. Икки өттүттэн эһээлэрэ –  Харлампьев Дмитрий Михайлович уонна Иванов Платон Васильевич – дойдуларыгар биллэр оһуохайдьыттар эбит. Кинилэри утумнаабыт буолуохтаах диэн, кырачаан уолу Дария Егоровна Алексеева ырыаҕа-тойукка дьаныһан туран дьарыктаабыт.

Фольклор көрүҥнэригэр уһуйуллубут уол Култуура уонна ускуустуба Аартыкатааҕы үнүстүүтүгэр туттарсан киирбит. Үөрэҕин бүтэрэн, ыал буолан, билигин Майа сэлиэнньэтигэр олохсуйан олорор. Онон иккис дойду оҥостубут Мэҥэтин аатын талба талаанынан аатырда сылдьар.

Станислав олоҥхону толорор эрэ буолбатах, өссө бэйэтэ айар: «Хорсун-хоодуот Хатан Боотур» диэн олоҥхолоох.

Бу олоҥхотун СӨ Национальнай бибилэтиэкэтэ аудио сыһыарыылаах электроннай кинигэ оҥорон таһаарбыта. Ону https://new.nlrs.ru/open/101838 сигэнэн киирэн ааҕыаххытын сөп.