Төрөөбүт төрүт тыл, сурук-бичик күнүн көрсө Опера уонна балет тыйаатырыгар ийэ тыл дьоро киэһэтэ буолан ааста.

Тэрээһиҥҥэ саха төрүт үгэһин көрдөрөр, уран тарбаҕынан оҥоһуктар, кинигэ кыһаларын атыыта, сахалыы тыыннаах тэрилтэлэр үлэлэрин түмүгүн көрдөрөр быыстапка-дьаарбаҥка буолан ааста.

СӨ Национальнай бибилэтиэкэтэ үгэс быһыытынан көхтөөх кыттыыны ылла, Саха сирин төрүт олохтоох омуктар киинин Кыраайы үөрэтэр национальнай пуонда салаата кинигэ быыстапкатын туруорда уонна саха тылын хоһуйар хоһоон ааҕыытын күрэҕин ыытта. Күрэх кыттыылаахтара тэрийээччилэртэн анал туоһу сурук туттулар.

Маны таһынан СӨ Национальнай бибилэтиэкэтин үлэһиттэрэ саха тылыгар туһуламмыт ИИ-бырайыактарын дьоҥҥо-сэргэҕэ билиһиннэрдэ, ол курдук оҥоһуу өй сахалыы саҥарбыккын тута сурукка тиһэр чат-ботун туһунан сиһилии кэпсээтилэр, оҥоһуу өй саха литературатын икки чулуу айымньытын сахалыы аахпытын куйаар куодунан хачайдаан ылан истэллэригэр ыҥырдылар.

СӨ Бырабыытылыстыбатын бэрэссэдээтэли солбуйааччыта Сергей Местников Национальнай бибилэтиэкэ оҥоһуу өйү баһылаабытын сэргээн иһиттэ уонна тута чат-бот үлэтин көрдө-иһиттэ.

«Национальнай бибилэтиэкэ ийэ тылы харыстыырга туһуламмыт бырайыактара аныгы олох сайдыытын кытта тэҥҥэ хаардылаан иһэрэ кэрэхсэбиллээх, маннык бырайыактар чахчы саха тыла өлбөт-сүппэт, үйэлээх буоларыгар көмөлөөхтөр», - диэн санаатын үллэһиннэ.

Салгыы саха литературата төрүттэммитэ 125 сылын, төрөөбүт тыл, сурук-бичик күнүн көрсө саха тылыгар ураты кылаттаах үлэлэрин бэлиэтээн туран Ил Дархан Айсен Николаев үрдүк сыанаҕа наҕараадалары туттартаата. Тэрээһин үөрүүлээх кэнсиэринэн түмүктэннэ. 

Национальнай бибилэтиэкэ Медиа киинэ.

Михаил Эверстов хаартыскаҕа түһэриитэ.