Ньурба оройуонун айар-суруйар куттаахтара үгэс буолбут тэрээһиннэрэ - "Ньурба көмүс күһүнэ" литэрэтиирэ күннэрэ балаҕан ыйын 5  күнүгэр саҕаланнылар.

Аан маҥнайгытын бу тэрээһин 1989 сыллаахха балаҕан ыйыгар ыытыллыбыта. Бу Өрөспүүбүлүкэҕэ сонун, аан маҥнайгы "Көмүс күһүн" этэ. "Ньурба уоттара" литературнай түмсүү кыттыылаахтара бу тэрээһини сөргүтэн, сыллата ыытыллар буолан, үтүө-мааны түһүлгэ өрүү айар куттаахтары түмэ тардар, дьон-сэргэ тоҕуоруһа мустар. 

Быйылгы тэрээһин саха норуодунай суруйааччыта, поэт, телесуруналыыс, Саха Өрөспүүбүлүкэтин култууратын үтүөлээх үлэһитэ, норуоттар икки ардыларынааҕы суруйааччылар Сойуустарын түмсүүтүн уонна Саха Өрөспүүбүлүкэтин суруйааччыларын Сойууһун чилиэнэ Наталия Михалева - Сайа, "Күрүлгэн" сурунаал сүрүн эрэдээктэрэ, "Кыым" хаһыат "Кулуһун" уус-уран сыһыарыытын эрэдээктэрэ, СӨ култууратын уонна бэчээтин туйгуна Афанасий Гуринов-Арчылан, композитор Христофор Трофимович Максимов пуондатын дириэктэрэ, Суруйааччылар сойуустарын норуоттар ыккардыларынааҕы түмсүүтүн, Арассыыйа Суруналыыстарын, СӨ Суруйааччыларын уонна СӨ Ырыа айааччыларын сойууһун чилиэнэ, СӨ култууратын туйгуна Михаил Санников-Уол Сарсын, Национальнай библиотека делегацията: научнай-чинчийэр киин сүрүн бибилэтиэкэрэ Маргарита Татаринова, кинигэ пуондатын сүрүн харайааччыта Анастасия Алексеева,  кинигэ пуондатын сүрүннүүр салаатын салайааччыта Евдокия Скоблова, кинигэ пуондатын сүрүн бибилэтиэкэрэ Евгения Гапанович, кинигэни чөлүгэр түһэрэр пуонда киинин сүрүннүүр бибилэтиэкэрэ Мария Старостина кыттыылаах ыытылла турар.



Суруйааччы, поэт, суруналыыс Клара Дмитриевна Васильева төрөөбүтэ 80 сылыгар анаан, кини олорбут дьиэтигэр турар мемориальнай дуоскаҕа сибэкки дьөрбөтүн уурдулар. Клара Дмитриевна аймахтара, балтылара уонна бырааттара кэлэн, эдьиийдэрин туһунан истиҥник ахтан-санаан аастылар.

"Ньурба көмүс күһүнүгэр" үгэскэ кубулуйбут биир истиҥ-иһирэх көрсүһүү ыраах Убайааҥҥа Варвара Потапова түмэл-уһаайбатыгар буолла. Варвара Потапова хоһоонноро, анабыл хоһооннор, Клара Васильева хоһоонноро ааҕылыннылар, олорбут дьиэтигэр оһоҕун тигинэччи оттон, арыылаах алаадьынан айах тутан, сүгүрүйэн аастылар.

Тэрээһин кыттыылаахтара салгыы Дьиикимдэ нэһилиэгэр суруйааччы Степан Федотов төрөөбүт Дьөттүн алааһыгар айан суолун туттулар. Дьиикимдэ нэһилиэгин баһылыга Прокопий Николаевич Осипов салайыытынан олус дириҥ ис хоһоонноох, бэрт сэргэх, истиҥ тэрээһин буолла. Манна Степан Федотов "Эргэ чымадаан кистэлэҥэ" кинигэтиттэн кинини поэт быһыытынан арыйар үгүс элбэх хоһоону, кинигэни хомуйан таһаартарбыт Луиза Канаева ааҕан, дьон-сэргэ биһирэбилин ылла. 

Дьиикимдэ дьоно-сэргэтэ салгыы уһуйааччы, поэт, тылбаасчыт, мелодист Аркадий Моякунов - Мойокуун Индеевка анаммыт балаҕаҥҥа ыалдьыттаттылар, кини айымньылаах үлэтин туһунан быыстапканы көрдөрдүлэр, хоһооннорун уонна тылбаастарын ааҕан ыалдьыттары долгуттулар.



Ньурба култуурата