Олунньу ыйга Төрөөбүт тыл уонна сурук-бичик күнүн декадатын чэрчитинэн, СӨ Национальнай бибилэтиэкэтигэр уонна өрөспүүбүлүкэ бары муниципальнай бибилэтиэкэлэригэр, Арассыыйа Москва уонна Калининград куораттарыгар “Сахалыы дьыктаан” аахсыйата 11-с төгүлүн ыытылынна. Бу үгэскэ кубулуйбут аахсыйа сыалынан-соругунан саха тылын суолтатын үрдэтии; саха тылын чөл хаалларарга уонна сайыннарарга туһаайыллыбыт тэрээһиннэри тэрийии; төрөөбүт норуокка патриотизм, таптал уонна убаастабыл санааларын, норуот төрүт үгэстэригэр, тылыгар харыстабыллаахтык сыһыаннаһыыны иитии буолар.

СӨ Национальнай бибилэтиэкэтигэр саха норуодунай поэта Иван Гоголев – Кындыл “Уу оҕуһун муоһугар суруктар” поэматыттан тиэкиһи суруйдулар. Манна барыта 90 киһи кыттыыны ылла.

Дьыктаан суруйуутун М.К.Аммосов аатынан ХИФУ Хотугулуу-Илиҥҥи олохтоох норуоттарын тылларын уонна култуураларын үнүстүтүүтэ Саха тылын хаапыдыратын үлэһиттэрэ бэрэбиэркэлээтилэр.

Бэрэбиэркэ түмүгүнэн сыыһата суох 5/5 сыанаҕа суруйдулар:

Ольга Бакрамова,

Лина Березкина,

Сардаана Макарова,

Лидия Манчурина,

Зарьяна Слепцова уонна Калининград куораттан Николай Кривошапкин

Ону таһынан 5/4 сыанаҕа - 11, 4/5 сыанаҕа – 1 киһи суруйдулар.

Кулун тутар 5 күнүгэр 16ч.00м. СӨ Национальнай бибилэтиэкэтин Кыраайы үөрэтэр пуонда салаатыгар кыайыылаахтары күүтэбит. (Ленин пр.40 №-дээх дьиэтэ, Историческай дьиэ, 1 этээс)