Анал байыаннай дьайыы чахчытын уус-уран тыл күүһүнэн арыйан, АБДь кыттыылаахтарын – буойуннар уонна доброволецтар – хорсун быһыыларын уонна бар дьон дойду кыайарын, барҕарарын туһугар дьулуурун көрдөрөр, саха тылын уонна уран суругун сайыннарар, айар куттаах дьону көҕүлүүр, саҥа уус-уран айымньы суруллуутун ситиһэр соруктаах «Дойдубут туһугар!» диэн ааттаах хоһоон күрэҕэ ситиһиилээхтик түмүктэннэ.

Күрэҕи «Ситим» медиа бөлөх, «Кыым» бар дьон хаһыатын уонна «Күрүлгэн» уус-уран сурунаал эрэдээксийэлэрэ Саха Өрөспүүбүлүкэтин Национальнай бибилэтиэкэтин өйөбүлүнэн тэрийэн ыыттылар.

Күрэх ахсынньы 19 күнүгэр биллэриллибитэ. Уонна олунньу 15 күнүгэр хоһоону тутуу тохтообута. Ити кэм устатыгар Дьокуускай куораттан уонна 16 улуустан (Амма, Бүлүү, Дьааҥы, Кэбээйи, Мэҥэ Хаҥалас, Муома, Нам, Ньурба, Олоохуна (Өлүөхүмэ), Сунтаар, Таатта, Томпо, Уус-Алдан, Үөһээ Бүлүү, Хаҥалас, Чурапчы) барыта 85 сайаапка киирэн дьүүл сүбэтин көрүүтүгэр турда. Сайаапка ахсааныгар хааччах суох буолан биир кыттааччы үс сайаапканы, икки кыттааччы иккилиини киллэрбиттэр. Онон барыта 81 хоһоонньут кытынна. Араас идэлээх дьон кыттыбыт. Саастаахтар да, эдэрдэр да бааллар.

Күрэх ирдэбилинэн сабыылаах дьүүл буолла, ол быһыытынан сүбэ кыттыылаахтара ааптардара ыйыллыбатах нүөмэрдэммит үлэлэри көрөн тус бэйэлэрин уон биэс бастыҥ хоһооннорун таллылар. Бастаабыт хоһооннор кинилэр оҥорбут эриэйтиннэрин тэҥнээн көрүү түмүгэр быһаарылыннылар.

Тургутааччылар күрэх ирдэбилин уонна саха тылын-суругун үгэһин тутуһууну, хоһоон хомоҕойун, ууһун-уранын, тыла-өһө этигэнин, хоһуйуута-дьүһүйүүтэ бэргэнин-сонунун, ис хоһооно тоҕоостооҕун, номоҕо дириҥин көрөн дьүүллээтилэр.

Сүбэҕэ үлэлээтилэр:

түсчүт – Фролова Галина Алексеевна, суруйааччы, СӨ Суруйааччыларын сойууһун чилиэнэ, СӨ култууратын туйгуна;

тургутааччылар: Григорьева Людмила Павловна – ХИФУ ХИНТуоКИ саха уран суругар кафедратын дассыана, филология билимин хандьыдаата; Иванова Линда Николаевна – Б.Ө. Ойуунускай аатынан уран сурук судаарыстыбаннай түмэлин солбуйааччы дириэктэрэ; Калининскай Алексей Кириллович-Луҥха Өлөксөйө – ырыа айааччы, СӨ норуодунай артыыһа; Калининская Варвара Иннокентьевна – суруналыыс, СӨ култууратын туйгуна; Капрынов Альберт Гаврильевич – суруналыыс, «Кыым» шеф эрэдээктэрэ; Кычкина Лариса Иннокентьевна – СӨ Национальнай бибилэтиэкэтин кыраайы үөрэтэр национальнай пуонда салаатын сэбиэдиссэйэ, филология билимин магистра; Попова Екатерина Ивановна – СӨ Национальнай бибилэтиэкэтин кыраайы үөрэтэр национальнай пуонда салаатын сүрүннүүр үлэһитэ; Черкашин Иван Петрович – Байыаннай дьайыылар бэтэрээннэрин өрөспүүбүлүкэтээҕи ассоциацияларын бэрэссэдээтэлэ, «Мужество» уордьан кавалера.

СӨ Национальнай бибилэтиэкэтин үлэһиттэрэ кыттыһан биир эриэйтини оҥордулар, Кэргэннии Калининскайдар эмиэ. Онон барыта сэттэ эриэйтин оҥоһуллан тургутууга турда.

Ол түмүгэр көрдөрүү маннык буолла.

I үктэл. 64-с №. Николай Николаевич Нутчин-Софронов-Ньукулай Дьуур.

Өлүөхүмэ улууһа, Кыыллаах нэһилиэгэ.

II үктэл. 18-с №. Прокопьева Елена Петровна. Мэҥэ Хаҥалас, Хочо бөһүөлэгэ.

III үктэл. 32-с №. Антонина Гаврильевна Хобусарова. Үөһээ Бүлүү.

Биһирэбил. 76-с №. Влада Эверстова. Нам улууhа, Υѳдэй нэhилиэгэ. «Отуу уота» түмсүү чилиэнэ.

Биһирэбил. 62-с №. Надежда Петровна Кардашевская-Куттаах. Үөһээ Бүлүү.

Ону сэргэ "Күрүлгэн" уус-уран сурунаал эрэдээксийэтин анал биһирэбилэ Усементай Николаевич Алексеевка (Дьокуускай к.) ананна.

Күрэх түмүктүүр тэрээһинэ олунньу 24 күнүгэр 16:00 чаастан СӨ Национальнай бибилэтиэкэтин историческай саалатыгар буолуоҕа.

Кыайыылаахтары, кыттыылаахтары, уус-уран тылы сэҥээрээччилэри, көхтөөх кыттыыны ыларгытыгар ыҥырабыт.

Кыттыбыт, өйөөбүт дьоҥҥо, тэрилтэлэргэ барҕа махтал буоллун! Бука барыгытын Аҕа дойдуну көмүскээччи күнүнэн итиитик-истиҥник эҕэрдэлиибит!

Тэрийээччилэр.