СӨ Национальнай бибилэтиэкэтигэр Төрөөбүт тыл уонна сурук-бичик күнүн бэлиэтиир тэрээһиннэр чэрчилэринэн олунньу 15 күнүгэр үгэс буолбут өрөспүүбүлүкэтээҕи «Сахалыы дьыктаан» аахсыйа буолан ааста.

Быйыл «Сахалыы дьыктаан» Саха сирин норуодунай бэйиэтэ Иван Гоголев – Кындыл төрөөбүтэ 95 сылыгар ананна. Дьыктааҥҥа Кындыл   «Уу оҕуһун муоһугар суруктар» диэн поэматтан «Сэттис сурук» быһа тардыы талыллан ааҕылынна.

Дьыктаан тиэкиһин М.К. Аммосов аатынан ХИФУ Арассыыйа Бэдэрээссийэтин Хотугулуу-Илиҥҥи норуоттар тылларын уонна култуураларын үнүстүүтүн  тыл хаапыдыратын сэбиэдиссэйэ, тыл билимин хандьыдаата Дария Чиркоева, тыл билимин хандьыдаата Алена Прокопьева уонна Дьокуускай куорат 26-с №-дээх орто оскуолатын саха тылын, литературатын уонна култууратын учуутала Марианна Борисова уонна СӨ Национальнай бибилэтиэкэтин Кыраайы үөрэтэр национальнай пуонда салаатын сэбиэдиссэйэ Лариса Кычкина аахтылар.

«Сыл аайы туох эрэ саҥаны, сонуну толкуйдуу сатыыбыт. Быйылгы дьыктаан уратыта диэн хоһоон көрүҥүн талбыппыт буолар, маныаха кыттааччылар кэккэ ыарахаттары көрсүбүт буолуохтарын сөп. Дьыктаан сорудаҕа суох, икки көрүҥүнэн сыаналанар: саха тылын билии уонна таба суруйуу», - диэн тэрийээччилэр бэлиэтииллэр.

«Сахалыы дьыктааҥҥа» сааһыттан, идэтиттэн тутулуга суох дьон кытталлар. Быйыл эмиэ устудьуоннар, учууталлар, үрдүк үөрэх кыһатын үлэһиттэрэ кытыннылар. Дьыктааны суруйа дьиэ кэргэнинэн кэлбиттэрин бэлиэтиир кэрэхсэбиллээх. Маныаха бу курдук хабааннаах тэрээһиннэр төрөөбүт тылы сайыннарыыга эрэ буолбакка, дьиэ кэргэн ситимин бөҕөргөтөргө көмөлөһөр диэн сыаналыахха сөп. Бу сыллар тухары дьыктаан толору саалалары хомуйан кэллэ. Тэрээһин киэҥник тарҕанан, сыл аайы элбэх кыттааччыны тардар. 

Саха тылын хаапыдыратын уһуйааччылара үлэлэри ый иһигэр бэрэбиэркэлээн, Национальнай бибилэтиэкэҕэ тиэрдиэхтэрэ. Хас биирдии кыттааччыга туоһу суруктары туттардылар, оттон бастыҥ үлэлээхтэри  Добун суругунан уонна сэмэй бэлэхтэринэн наҕараадаланыахтара.

Санатан этэххэ, «Сахалыы дьыктаан» 2014 сылтан ыытыллар. Аахсыйаны М.К. Аммосов аатынан ХИФУ Арассыыйа Бэдэрээссийэтин Хотугулуу-Илиҥҥи норуоттар тылларын уонна култуураларын үнүстүүтэ, СӨ Национальнай бибилэтиэкэтэ көҕүлээн, тэрийэн үгэскэ кубулутан сыл аайы тэрээһиннээхтик ыыталлар.