Историческай наука кандидата, Саха АССР култууратын үтүөлээх үлэһитэ, Уус-Алдан улууһун Бочуоттаах олохтооҕо Дмитрий Дмитриевич Петров сүдү аатыгар сүгүрүйэр ахтыы түһүлгэтин СӨ Бырабыыталыстыбата уонна СӨ Национальнай бибилэтиэкэтин кыраайы үөрэтэр национальнай пуонда салаата бэс ыйын 3 күнүгэр көҕүлээн тэрийэн ыыттылар.

Дмитрий Петров Аҕа дойду Улуу сэриитигэр хорсун быһыыны оҥорбут саха саллааттарын, сэрии кэмигэр саха дьоно-сэргэтэ киллэрбит кылааттарын историятын сиһилии үөрэппит, киэҥ эйгэҕэ таһаарбыт учуонай буолар. Ол курдук, аҕа дойду сэриитигэр биһиги норуоппутугар улахан сүтүгү аҕалбыт Ильмень күөл историятын, сэриигэ геройдуу быһыыны оҥорбут саха саллааттарын ааттара тиллэригэр Сэбиэскэй Сойуус уонна Россия Дьоруойдара буолалларыгар үгүс үлэни ыыппыта.

Бу күн Дмитрий Дмитриевич оҕолоро, сиэттэрэ, үөлээннээхтэрэ, биир дойдулаахтара кэлэн истиҥ ахтыылары оҥордулар. Төрөппүт оҕолоро Анатолий, Панкратий, Юрий Петровтар саха наукатыгар оҥорбут үлэлэрин сырдатан аҕыннылар. СӨ норуотун хаһаайыстыбатын үтүөлээх үлэһитэ А.В.Мигалкин, история билимин хандьыдаата, кыраайы үөрэтээччи П.П.Петров, о.д.а. дириҥ ис хоһоонноох этиилэрэ дьон-сэргэ болҕомтотун тартылар.

Бу түһүлгэ ис хоһоонун дириҥник арыйарыгар СӨ Национальнай бибилэтиэкэтин кыраайы үөрэтэр национальнай пуонда салаата «Летописец подвига народа Петров Дмитрий Дмитриевич» диэн кинигэ быыстапкатын туруорда. Тэрээһини Ил Дархан уонна СӨ Бырабыыталыстыбатын дьаһалтатын Тыл сайдыытын боппуруостарын сүрүннүүр дьаһалта салайааччыта, тыл билимин хандьыдаата Р.Р.Жиркова иилээн-саҕалаан ыытта.

Екатерина Попова, СӨ Национальнай бибилэтиэкэтин кыраайы үөрэтэр пуонда салаатын бибилэтиэкэрэ