Муус устар 15 күнүгэр Национальнай библиотека Историческай саалатыгар СӨ Тас сибээһин министиэристибэтин «Норуоттар доҕордоһуулара» өйдөбүнньүк бэлиэ хаһаайына, норуот эмчитэ, «Юрта мира» норуоттар икки ардыларынааҕы уопсастыбаннай тэрээһин бэрэсидьиэнэ, саха ынаҕын тас дойдуга билиһиннэрбит, история билимин хандьыдаата Александра Михайловна Григорьева тас дойдуга олорбута 24 сылын отчуоттуур, дьонун-сэргэтин кытта истиҥ-иһирэх көрсүһүү киэһэтэ буолан ааста. Тэрээһини Кыраайы үөрэтэр национальнай кинигэ салаатын үлэһиттэрэ уонна «Айгы ситимэ» уопсастыбаннай түмсүү кыттыылаахтара ыыттылар.

Көрсүһүүгэ социология билимин хандьыдаата, СӨ норуодунай суруйааччыта Андрей Кривошапкин, үөрэх билимин хандьыдаата, Арассыыйа үтүөлээх учуутала Розалия Кривошапкина, Эбээн Бытантайтан Гороховтар киэҥ аймахтара, Ил Түмэн наукаҕа уонна үөрэххэ кэмитиэтин бэрэсэдээтэлэ, норуот дьокутаата Антонина Григорьева, Атомнай бырамыысалыннас бэтэрээнэ, техническэй билим хандьыдаата, «Кут Дабаан» экодухуобунай бырайыак ааптара Иоган Максимов, экономика билимин дуоктара, ХИФУ бэрэпиэссэрэ, экономическай теория хаапыдыратын сэбиэдиссэйэ Анатолий Попов кытыннылар. 

Александра Михайловна Григорьева тас дойдуларга 24 сыллаах үлэтин туһунан «Айгы ситимэ» уопсастыбаннай түмсүү салайааччыта Александр Протодъяконов ааҕан иһитиннэрдэ.

Көрсүһүүнү этнопедагог, культуролог Анна Андреевна Холмогорова иилээн-саҕалаан ыытта.