Тохсунньу 21 күнүгэр СӨ Национальнай библиотекатын Историческай саалатыгар «Сунтаар Хаҥалаһа - мин дойдум» диэн саҥа кинигэ сүрэхтэннэ. Тэрээһини олоҥхону үөрэтээччи, фольклорист, тыл үөрэҕин билимин дуоктара, бэрэпиэссэр Василий Илларионов уонна суруналыыс Анивера Акимова иилээн-саҕалаан ыыттылар. 

Хаҥалас ыалларын, сыдьааннарын тустарынан кэпсиир, элбэх историческай докумуоннарга сигэммит кинигэни Хаҥаластан төрүттээх Антонина Елисеевна Осипова - Григорьева, Кутана нэһилиэгин олохтооҕо, Саха Өрөспүүбүлүкэтин үөрэҕириитин туйгуна Семён Михайлович Андреев уонна биир дойдулаахтара Анетта Андреевна Егорова хомуйан бэчээккэ таһаардылар.

Кинигэҕэ былыргы былдьаһыктаах дьылларга Улуу Туймаада эбэттэн көһөн кэлбит Хаҥалас аҕатын ууһа билиҥҥи Сунтаар улууһун сиригэр олохсуйан, Хаҥалас буолаһа (нэһилиэгэ) диэн саамай улахан, киэҥ сирдээҕинэн-уоттааҕынан биллибит нэһилиэги олохтоон, уутуйан олорбутун, биллэр-көстөр дьонноох аҕа уустарын төрүттээбитин, ол дьон олохторун-дьаһахтарын, үлэлэрин-хамнастарын тустарынан архыып докумуоннарынан итиэннэ дьоннор ахтыыларыттан сырдатыллар.