Ахсынньы 28 күнүгэр СӨ Национальнай библиотекатыгар 10 кылаас үөрэнээччитэ Артем Дьячковскай чинчийэр үлэтэ кинигэ буолан тахсыбыт үөрүүлээх сүрэхтэниитэ буолан ааста. Артем Дьячковскай Өрөспүүбүлүкэтээҕи лицейгэ үөрэнэр, улууһун, нэһилиэгин оскуолаларын ааттаппыт оҕо диэн учууталлара бэлиэтииллэр. Кини «Инникигэ хардыы» өрөспүүбүлүкэтээҕи, Бүтүн Арассыыйатааҕы билим кэмпириэнсийэлэргэ үрдүк ситиһиилэрдээх.

Иван Иванович, Христина Исаковна Степановтар 2015 сыллаахха Чурапчы улууһун Одьулуун нэһилиэгэр дьиэ кэргэн этническэй түмэлин тэрийбиттэр. Бу түмэлгэ аймахтар бары кыттыһан үлэлииллэр эбит. Манна дьон-сэргэ сөбүлээн сылдьар, кэлбит ыалдьыттарга сиэн оҕолор эһэлээх эбэлэрин кытта экскурсия тэрийэллэр.

Артем Дьячковскай иккис кылаастан саҕалаан чинчийэр үлэнэн дьарыктанар. Хас биирдии киһи төрдүн-ууһун билиэхтээх, дириҥэтэн үөрэтиэхтээх диэн санаанан салайтаран, дьиэ кэргэнэ, төрүттэрэ-уустара тутта сылдьыбыт малларын, сирдэрин-уоттарын үөрэтэр. Маныаха эһэлээх эбэтэ тэрийбит түмэллэрэ төһүү күүс буолбут.

«Инникигэ хардыы» кэмпириэнсийэ кэмигэр «Чуораанчык» сурунаал Артем үлэтин сэргии көрөн, саҥа форматтаах кинигэ оҥорон таһаарбыт.

«Дьокуускайга Өрөспүүбүлүкэтээҕи билим кэмпириэнсийэҕэ аан маҥнайгыбын кэлэрбэр, араас улуустартан үгүс да оҕо баара, олус долгутуулаах этэ. Ол кэмҥэ «Кэскил» оҕо кыһатыттан интервью ылбыттара. Кинигэ тахсыбытыгар сурунаалга, төрөппүттэрбэр, салайааччыбар махтанабын», - диэтэ Артем.

«Кинигэ ытыс саҕа да буоллар, учуутал, оҕо, төрөппүт олоххо киирбит идеялара, баайа буолар. Суруллубут суоруллубат, кэнники оҕолоргут, сиэннэргит ааҕыахтара. «Чуораанчыгы» хас биирдиигит билэр, аахпыт буолуохтаах. Бу кинигэҕэ дьиэ кэргэн маллара киирдилэр: чугуун хобордоох, сиэл сиидэ, ыскаап, сибээскэ, саахымат сабыы. Онон Артему эҕэрдэлиибин уонна өссө үрдүк ситиһиилэри баҕарабын», - диэтэ  Чуораанчык сурунаал үлэһитэ Ньургуйаана Захарова.

Чурапчы Одьулуунугар Степановтар ыалдьыты үөрэ көрсөллөр, дьиэ кэргэн түмэлин кэлэн көрөргүтүгэр ыҥыраллар.