СӨ Национальнай бибилэтиэкэтигэр Ньурба сириттэн бастакы суруйааччы үрдүк аатын ылбыт ССРС суруйааччыларын сойууһун чилиэнэ, ССРС суруналыыстарын сойууһун чилиэнэ Степан Прокопьевич Федотов төрөөбүтэ 90 сылыгар аналлаах дьоро киэһэ буолан ааста.

Степан Федотов литератураҕа эмискэ киирбит: үс бастакы очеркалара Саха сирин суруналыыстарын күрэҕэр соҕотохто бастакы, иккис, биһирэбил бириэмийэтинэн бэлиэтэмиттэрэ. Ол очеркалара 1962 сыллаахха «Кынаттаах олох» диэн бастакы кинигэтигэр тахсан ааҕааччы биһирэбилин ылбыттара.

«Кынаттаах олохтон» саҕалаан суруйааччы бөрүөнү тутарын тухары сэрии алдьархайдаах сылларын туһунан үгүс айымньылары суруйбута: «Огдоос эмээхсин уонна Бүлүү эбэ», «Олох тосхоллоро», «Үһүстээн тиллии», «Хайыахха?» уо.д.а.

С.П. Федотов «Эдэр коммунист», «Социалистическая Якутия», «Кыым» хаһыаттарга корреспонденынан үлэлээбитэ, зоотехник идэлээх буолан, тыа үлэһит дьонун олоҕун, үлэтин-хамнаһын уустаан-ураннаан сырдатар этэ.

Онтон кэлин, суох буолбутун кэннэ, доҕоро Василий Гольдеров, хаһыат эйгэтигэр бииргэ үлэлээбит үөлээннээҕэ Фекла Петрова уонна талааныгар сүгүрүйээччи биир дойдулааҕа Луиза Канаева айымньыларын хомуйан таһаарбыт кинигэлэринэн эбиллэн, билигин уопсайа 13 кинигэлээх.

Суруйааччы үбүлүөйдээх сылын көрсөр тэрээһини Арктикатааҕы култуура уонна ускуустуба устудьуоннара хоһоонунан хоһуйан, баян тыаһын ыллата оонньоон бэрт сэргэхтик астылар.

Ньурбалар киэн туттар киһилэрэ Саха сирин үтүөлээх артыыската Маргарита Борисова Степан Федотов суруйбут «Симириктии сырдыыр сыа чүмэчи» кэпсээнин олус долгутуулаахтык, көрөөччү кутун тутардыы ааҕан иһитиннэрдэ.

«Айар» кинигэ кыһатын салайааччыта Август Егоров биир дойдулааҕа суруйааччы Степан Федотов кылгас уонна чаҕылхай олоҕор үлэлээн-хамсаан, олорон ааспыт олоҕун кэрдиис кэмнэрин саас сааһынан ылыннарыылаах тылынан ыпсаран кэпсээтэ уонна Ньурба улууһун чулуу киһитин аатын үйэтитиигэ үлэлэһэр дьоҥҥо, дьоро киэһэни тэрийээччилэргэ махтал тылларын тириэртэ.

Сытыы бөрүөлээх суруналыыс, талааннаах суруйааччы Степан Федотов аатын ааттаан, дьоро киэһэҕэ элбэх киһи кэлэн кыттыыны ылла, ол курдук Валентина Сухаринова тойук туойан дьиэрэттэ, поэт Василий Гольдеров кыыһа поэтесса Саргылана Гольдерова-Саргы Куо аҕатын чугас доҕорун туһунан бэрт истиҥник ахтан-санаан ааста.

Тэрээһиҥҥэ анаан Национальнай бибилэтиэкэ кыраайы үөрэтэр салаата Степан Федотов үлэлэрин сырдатар кинигэ быыстапкатын бэлэмнээн туруорда.

 Суруйааччы албан аатын биир дойдулаахтара, ньурбалар, ытыгылыы, өрө-тута, үйэтитиигэ үлэлии-хамсыы сылдьаллара кэрэхсэбиллээх.

СӨ Национальнай бибилэтиэкэ Медиакиинэ