Дьокуускайдааҕы «Эрчим» социальнай хааччыйыы кэлим киинин аҕа саастаах дьонугар «Валерий Ноев – иэйии ырыаһыта» диэн саха норуотун биллиилээх мелодиһа Валерий Ноев бу сэтинньи 20 күнүгэр төрөөбүтэ 85 сылын көрсө тэрээһин ыытылынна.

СӨ Национальнай бибилэтиэкэтин үлэһитэ Туяра Готовцева Валерий Ноев олоҕун, айар үлэтин туһунан быыстапканы билиһиннэрдэ. Үөлээннээхтэрин, биир дойдулаахтарын ахтыыларын, ырыанньыктары, үбүлүөйдээх сылларыгар өйдөбүнньүк үйэтитии кинигэлэрин туһунан аҕа саастаах дьон сэргии иһиттилэр.

Тэрээһин кыттыылаахтарыгар Валерий Ноев ырыаларынан музыкальнай викторина ыытылынна, кыайыылаахтар бириискэ тигистилэр. Маны таһынан, «Киһиэхэ төрөөбүт дойдута» диэн биллиилээх ааптар, ырыаһыт Валерий Ноев туһунан мелодист, ырыаһыт Аркадий Алексеев документальнай киинэтин көрөн-истэн, чахчы да айылҕаттан уһулуччу талааннаах киһи эбит диэн итэҕэйдилэр.

Ырыаҕа анаммыт тэрээһин ырыа доҕуһуоллаах, тэҥҥэ ыллааһыннаах буолла. «Эрчим» социальнай киин үлэһиттэрэ: Степан Васильев, Татьяна Сергучева, Ольга Божедонова уонна Валерий Ноев биир дойдулааҕа, кини аатынан ырыа күрэхтэрин хас эмэ төгүллээх лауреата, дипломана Михаил Санников толорууларыгар Валерий Ноев репертуарыттан ырыалары истэн дуоһуйа сынньаннылар, сүргэлэрэ көтөҕүлүннэ, тэҥҥэ ылластылар.

Кырдьык даҕаны, Валерий Ноев ырыаларын саха дьоно эдэриттэн кырдьаҕаһыгар тиийэ бары сэргээн, сөбүлээн истэллэр, ыллыыллар. Талааннаах ырыаһыт, композитор Валерий Власьевич Ноев сахатын норуотугар бэлэхтээбит үтүөкэннээх ырыалара өр сылларга, уһун дьылларга уостубакка, олоҕу кытта тэҥҥэ хардыылаан дьиэрэһийэ туруохтара.

Маны таһынан, Дьокуускайдааҕы «Эрчим» социальнай хааччыйыы кэлим киинигэр сахалартан бастакы олимпийскай чемпион Роман Дмитриев төрөөбүтэ 75 сылыгар аналлаах тэрээһин буолан ааста. Библиотека үлэһиттэрэ улуу спортсмен олоҕун, үлэтин-хамнаһын кэрэһэлиир кинигэ быыстапкатын, виртуальнай быыстапканы көрдөрдүлэр, бириистээх викторина ыыттылар.

Аҕа саастаах дьон спортсменнар ситиһиилэрин, олохторун сэргии иһиттилэр, саха улуу тустууктарын тустарынан  «Триумф» диэн киинэни көрөр баҕа санаалаахтарын эттилэр.