Олунньу 13 күнүгэр Төрөөбүт тыл уонна сурук-бичик күнүн бэлиэтээтибит. Бу күҥҥэ анаан Саха Өрөспүүбүлүкэтин Национальнай библиотеката араас хабааннаах тэрээһиннэри ыытар.

Ол курдук Өрөспүүбүлүкэтээҕи социальнай хааччыйыы кэлим киинигэр аан бастакытын “Сахалыы дьыктаан” буолан ааста. Тэрээһини социальнай киин үлэһитэ Саргылана Максимова иилээн-саҕалаан ыытта.

Онус төгүлүн ыытыллар дьон-сэргэ биһирэбилин ылбыт “Сахалыы дьыктааны” Национальнай библиотека үлэһитэ Туйаара Готовцева ааҕан иһитиннэрдэ. Дьыктаан тиэкиһэ саха народнай суруйааччыта Софрон Данилов “Барымаҥ даа, кубалар” диэн 1984 сыллаахха суруллубут айымньытыттан ылылынна, быйыл роман суруллубута 40 сыла.

Кыттааччылар тэрээһиҥҥэ бэлэмнэнэн, бары сахалыы таҥас кэтэн дьыктааны суруйдулар. Саамай аҕа саастаах кыттааччы 83 саастаах Мария Семеновна Иванова буолла, барыта 11 киһи суруйда.

"Бастыҥтан бастыҥ" суруксут - Маргарита Давыдова, "Бастыҥ суруксут" - Светлана Семенова, "Үчүгэй суруксут" Мария Иванова буоллулар.

Бу социальнай биир кэлим кииҥҥэ дьиэ-уот тэринэн, 308 киһи олорор эбит, күнүһүн маҥнайгы этээскэ түһэн, доруобуйаларын көннөрүнэллэр, эмтэнэллэр. Маннык тэрээһиннэргэ сылдьан, сэргэхсийэллэр, дьону-сэргэни кытта билсэллэр, элбэҕи билэллэр-көрөллөр диэн үлэһиттэр бэлиэтииллэр.

Маны таһынан олунньу 13 күнүгэр Дьокуускай куорат 27 нүөмэрдээх орто оскуолатыгар библиотека үлэһиттэрэ Төрөөбүт тыл уонна сурук-бичик күнүгэр аналлаах кылаас чааһын ыыттылар уонна Пушкинскай картаны оҥорон биэрдилэр. Тэрээһиннэргэ 8-9 кылаас үөрэнээччилэрэ кытыннылар.

Ол курдук биир кэлим өҥөнү оҥорор салаа үлэһитэ Васса Павлова Электроннай библиотека туһунан кэпсээтэ, оҕо үөрэҕэр, эбии дьарыктанарыгар хайдах туһанарын сырдатта уонна тылга аналлаах виртуальнай быыстапканы көрдөрдө. Сахалыы кинигэлэри Электроннай библиотекаҕа Новгородов алпаабытынан суруллубут тиэкиһи ааҕан иһитиннэрдилэр. 

Электроннай өҥө секторын үлэһитэ Анна Наумова оҕолорго Пушкинскай карта туһунан кэпсээтэ, картаны ыларга көмөлөстө.

Төрөөбүт тыл уонна сурук-бичик күнүн декадата салҕанар. Библиотека үлэһиттэрэ төрөөбүт тылга аналлаах тэрээһиннэри тохтоппокко ыыталлар.

Санатар буоллахха, СӨ Национальнай библиотекатыгар олунньу 17 күнүгэр 14.00 чаастан үбүлүөйдээх “Сахалыы дьыктаан” аахсыйа ыытыллыаҕа, төрөөбүт тылгытын төһө билэргитин, таба суруйууга холонон көрөргүтүгэр ыҥырабыт. Дьыктаан туһунан сиһилии манна көрүҥ.