Олунньу 9 күнүгэр кэрэхсэбиллээх бырайыактары оҥорорго, араас хабааннаах кинигэлэри бэчээккэ бэлэмнииргэ, киэҥ эйгэҕэ билиһиннэрэргэ, тарҕатарга, ол аата национальнай бэчээт уонна Саха сирин норуоттарын литературалара сайдыытыгар тус кылааттарын киллэрсэр, «Айар» кыһаны кытта айымньылаахтык үлэлэһэр дьону, тэрилтэлэри бииргэ түмэн, сыралаах үлэлэрин бэлиэтээн, ааспыт сыл үлэ түмүгүнэн «Айардыын бииргэ. Сыл бастыҥнара - 2023» диэн тэрээһинин ыытта. 

«Айар» кинигэ кыһата маннык улахан тэрээһини иккис сылын ыытар, анан ааттарынан бэлиэтиир.

Ол курдук «Бастыҥ партнер: бииргэ үлэлэһээччи» анал ааты Саха Өрөспүүбүлүкэтин Национальнай библиотекатыгар туттарда. 

Бэлиэтээн эттэххэ, Национальнай библиотекаҕа «Айар» кинигэлэрэ кэлэ тураллар, ааҕааччыларга күндү бэлэх буолаллар, ону таһынан араас таһымнаах бырайыактарга, тэрээһиннэргэ куруук бииргэ үлэлэһэллэр. 

«Айар» кинигэ кыһатын кэлэктиибигэр, салайааччытыгар Август Васильевич Егоровка библиотека аатыттан махталбытын биллэрэбит!