Быйыл Ийэ дойдубут Улуу Кыайыы 80 сылын өрөгөйдөөх күнүн бэлиэтиир. Ол чэрчитинэн араас хабааннаах үлэлэр ыытыллаллар. СӨ Национальнай бибилэтиэкэтин Саха сирин төрүт олохтоох омуктар киинин Кыраайы үөрэтэр национальнай пуонда салаата бу күнү көрсө сыл устата тиһиктээх үлэни былааннаан тэрийэр.

Ол курдук, бибилэтиэкэ Кыраайы үөрэтэр салаа ааҕар саалатыгар уонна СӨ Ил Түмэн судаарыстыбаннай мунньаҕын дьиэтигэр “Якутия в годы Великой Отечественной войны” диэн дириҥ ис хоһоонноох кинигэ быыстапкатын туруорда. Быыстапкаҕа уоттаах сэрии сылларыгар дойду туһугар кыргыспыт чулуу буойуттарбыт хорсун быһыыларын кэрэһэлиир, сэрии кэмигэр Саха сирин оройуоннарын историятын сэһэргиир кинигэлэр дьон-сэргэ сэҥээриитин ылаллар.

Аҕа дойду Улуу сэриитин үөрэппит, чинчийбит учуонай, хас да кинигэ ааптара Д.Д. Избеков, устуоруйа билимин хандьыдаата Д.Д. Петров “Якутия в годы Великой Отечественной войны” 2 чаастаах монографията, «Саллааттар суруктара», Саха сирин буойуннарын үйэтитээччи Д.Н. Гаврильев Арассыыйа уонна СӨ байыаннай уонна национальнай архыыбыгар олоҕурбут кинигэлэрэ, 10 чаастаах Аҕа дойду Улуу сэриитигэр охтубут буойун сахалар ааттарын үйэтитиигэ аналлаах “Память” мемориал-кинигэ, уо.д.а. бу быыстапка дириҥ ис хоһоонун арыйаллар.

Бу кинигэлэр кэлиҥҥи көлүөнэ Аҕа дойду Улуу сэриитин чинчийэн үөрэтээччилэригэр олук буолбут үлэлэр быһыытынан сыаналаналлар. Кинигэ быыстапката эдэр ыччакка сэрии ыар сылларын арылхайдык арыйыа, ХХ үйэ алдьархайын, Сэбиэскэй сойуус бырааттыы норуоттара Улуу Кыайыы туһугар киллэрсибит кылааттарын, хорсун быһыыларын сыаналыырга, өйдүүргэ олук ууруо.

“Якутия в годы Великой Отечественной войны” кинигэ быыстапкатын кэлэн көрүҥ, сэргээҥ!

Ким да умнуллубат! Туох да умнуллубат!