Бүгүн, бэс ыйын 30 күнүгэр, Саха сиригэр сардаана сибэкки күнүн бэлиэтииллэр. Сайыммыт биир дьикти кэрэ бэлэҕэ сир аайы хонууну толору, алааһы ылардык үүммэт, таптаан үүнэр сирдэрдээх, онно сыттаҕа буолуо кини хараҕы манньытар, дьону тардар дьикти туспа алыба. Сардаана сибэкки 2000 сылтан сүтэн эрэр көрүҥ быһыытынан Саха сирин Кыһыл кинигэтигэр киирбитэ.

Онтон кэрэни кэрэхсиир, айар куттаах дьон сардаана кыыһар кыһыл уотун, дьикти нарын моһуонун хоһооҥҥо хоһуйан, ырыаҕа ыллаан үйэтиппиттэрэ үгүс.

Бүгүн ааҕааччыларбытыгар электроннай бибилэтиэкэ нөҥүө сардаана сибэкки күнүгэр Иван Федосеев-Доосо «Сардаана» диэн ырыа буолбут хоһооннорун хомуурунньугун, Иван Гоголев-Кындыл «Сардаана» хоһооннорун хомуурунньугун, Саргылана Гольдерова-Саргы Куо «Аммаҕа тыллыбыт сардаана» хоһооннорун, поэмаларын хомуурунньугун, Дмитрий Наумов «Сардаана сибэкки» биир ооньуулаах, алта хартыыналаах остуоруйатын билиһиннэрэбит.