Төрөөбүт тыл уонна сурук-бичик күнүгэр СӨ Национальнай бибилэтиэкэтин үлэһиттэрэ «Сахалыы дьыктаан» аахсыйаны бииргэ үлэлэһэр тэрилтэлэригэр ыыттылар. Ол курдук, Дьиэ кэргэнинэн ааҕыы А.П. Гайдар аатынан саалата Дьокуускайдааҕы индустриальнай-педагогическай кэллиэс устудьуоннарыгар аахсыйаны тэрийдэ. Онно дьыктааны СӨ Национальнай бибилэтиэкэтин үлэһитэ Анисия Иевлева аахта.

Сотору кэминэн сыбаарсык, массыынаны өрөмүөннүүр маастар, иистэнньэҥ идэтин ылан, өрөспүүбүлүкэбит сайдыытыгар төһүү күүс буолуохтаах ыччат дьоммут бу күн буойун бэйиэт Тимофей Сметанин «Кыайбыттар ыһыахтара» диэн уус-уран дьүһүйүүтүн суруйдулар.

Уот сэрии ортотунан ааспыт суруйааччы, кыайыыны уруйдаан, эйэлээх олоҕу айхаллаан, сүргэтэ көтөҕүллэн, хомоҕойдук хоһуйбут айымньыта ол күүрүүлээх туругун дьүөрэ элбэх күүһүрдэр этиилээх, сурук бэлиэлээх, ойуулуур-дьүһүннүүр тыллардаах. Онон тиэхиньиичэскэй идэлээх дьоҥҥо чэпчэкитэ суох тиэкис буолан биэрдэ.

Ол да буоллар, нууччалыы да саҥалаах сахалар аккаастаммакка, бары холонон көрдүлэр, сахалыы төһө билэллэрин бэрэбиэркэлэннилэр, кыттыбыттарын туоһулуур суруктары туттулар. Оттон бастыҥ суруксуттар төрөөбүт тыл дэкээдэтин түмүктүүр тэрээһиҥҥэ Добун суругунан наҕараадаланыахтара.

Бу сырдатар аахсыйаны тэрийэрбитин өйөөбүт Дьокуускайдааҕы индустриальнай-педагогическай кэллиэс саха тылын учуутала Кристина Александровна Харлампьеваҕа уонна бибилэтиэкэр Ольга Ивановна Бессоноваҕа махталбытын биллэрэбит.

Оттон Өрөспүүбүлүкэтээҕи социальнай хааччыйыы кэлим киинин олохтоохторо, ону тэҥэ «Эрчим» отделение үлэһиттэрэ уонна сынньанааччылара аахсыйаҕа быйыл иккис төгүлүн кытыннылар. Аҕам саастаах уонна доруобуйаларынан хааччахтаах дьон, тэрилтэ үлэһиттэрэ - барыта 30 киһи саха норуодунай бэйиэтэ Иван Михайлович Гоголев-Кындыл «Хара кыталык» айымньытыттан ылыллыбыт тиэкиһи суруйдулар. Аахсыйаны Туяра Готовцева ыытта.

Норуот бэйэтин омук быһыытынан төһө ытыктанара суругуттан-бичигиттэн көстөр. "Онон бары сыыһата суох суруйарга кыһаллыаҕыҥ", - диэн этэн туран, сарсын барыгытын дьыктааҥҥа ыҥырабыт. Дьыктаан олунньу 15 күнүгэр күнүс 14.00 чаастан СӨ Национальнай бибилэтиэкэтин Историческай саалатыгар уонна сүрүн дьиэтигэр 2 этээскэ буолуоҕа.