Төрөөбүт тыл уонна сурук-бичик күнүнэн сылын аайы ыытыллар өрөспүүбүлүкэтээҕи "Сахалыы дьыктаан" аахсыйа  быйыл 11-с төгүлүн ийэ тылбыт кэскилин туһугар туруулаһааччылары түмүө.

СӨ Национальнай бибилэтиэкэтэ уонна М.К. Аммосов аатынан ХИФУ Арассыыйа Бэдэрээссийэтин Хотугулуу-Илиҥҥи олохтоох норуоттарын тылларын уонна култуураларын үнүстүүтэ сахалыы суруйар таһымҥын бэрэбиэркэлэнэргэ, биир санаалаах дьоҥҥунуун көрсөн сэһэргэһэргэр тоҕоостоох түгэни бэлэхтиир.

Дьыктаан олунньу 15 күнүгэр күнүс 14.00 чаастан СӨ Национальнай бибилэтиэкэтин Историческай саалатыгар уонна сүрүн дьиэтигэр 2 этээскэ буолуоҕа.

«Сахалыы дьыктаан» аахсыйа ыытыллар сыала-соруга: сахалыы уус-уран тылы уонна саха тылын таба суруйуу быраабылаларын олоҕурдууну өйөөһүн, саха тылын суолтатын үрдэтии уонна төрөөбүт норуокка тапталы, норуот төрүт үгэстэригэр, тылыгар харыстабыллаах сыһыаны иитии-такайыы.

Хас биирдии кыттааччыга «Сахалыы дьыктаан» аахсыйаҕа кыттыбытын туһунан туоһу сурук туттарыллыа, оттон уһулуччу үлэлэргэ анал бириистэр, өйдөбүнньүк суруктар ананыахтара.

Киэҥ далааһыннаах аахсыйаҕа сылын ахсын элбэх киһи кыттар, былырыын 4 тыһ. тахса киһи сахалыы дьыктааны суруйбута. Буоларын курдук, бу аахсыйа өрөспүүбүлүкэбит араас муннугар, улуус, нэһилиэк бибилэтиэкэлэригэр тэриллэн ыытыллыа.

Саха тылын чөл хаалларарга уонна сайыннарарга туһаайыллыбыт тэрээһиҥҥэ көхтөөх кыттыыны ыларгытыгар ыҥырабыт.

Сахалыы дьыктаан балаһыанньата.