Олунньу 21 күнүгэр дойду Бэрэсидьиэнэ Владимир Путин Федеральнай мунньахха анал туһаайыытын эттэ. Туһаайыыга сүрүн болҕомто уопсастыба бигэ туруктаах буоларын ситиһэргэ култуура оруола күүһүрүөн наадатын ыйда. Бу туһунан өрөспүүбүлүкэ култуураҕа уонна духуобунай сайдыыга миниистирин бастакы солбуйааччыта Афанасий Ноев санаатын үллэһиннэ.  

- Бастатан туран, Бэрэсидьиэн Владимир Путин бүтүн Россия олохтоохторугар эр санааларын уонна дьоруойдуу быһыыларын иһин махтанарын биллэрдэ. Россия, былыр-былыргыттан элбэх омук олохсуйбут дойдута, сомоҕо күүс буолбутун тоһоҕолоон бэлиэтээбитэ сүргэбитин көтөҕөр.

Итини таһынан бэрэсидьиэн Столыпин эппит тылларын холобур аҕалла уонна Россия күүстээх дойду буоларга бырааптааҕын туһунан эттэ. Ол аата Дойду быһыытынан биһиги күүстээх буоларга дьулуһуохтаахпыт. Итини ситиһэргэ былаас култуураны, айар үлэни, дьоҕурдаах дьону өйүөҕүн туһунан иһитиннэрдэ. Култуура уопсастыбаны сатарыппакка, төттөрүтүн үтүө быһыыга-майгыга, эйэни-кэрэни сыаналыырга уонна харыстыырга үөрэтиэхтээҕин туһунан эттэ. Бу этиини, мин култуура эйгэтин үлэһитэ буоларым быһыытынан, ордук сэргии иһиттим. 

Итини сэргэ бэрэсидьиэн дьоҥҥо босхо социальнай гаастааһын бырагыраамата салгыы үлэлиэ диэн эттэ. Бу быһаарыы биһиги Сахабыт сирин курдук тыйыс усулуобуйалаах региоҥҥа олус көдьүүстээх буолара саарбахтаммат.  

Быйыл биһиги өрөспүүбүлүкэбитигэр Үлэ сыла биллэриллэн турар. Онон дойдубут Бэрэсидьиэнин анал туһаайыытыгар туруоруллубут сыалы-соругу бары бииргэ түмсэн, таһаарыылаахтык үлэлээн-хамсаан, сомоҕолоһон ситиһиэх тустаахпыт.