СӨ үтүөлээх артыыһа Майя Петровна Слепцова дьон-сэргэ сахалыы ааҕарын, саха литературатын айымньыларын истэн, төрөөбүт тылын умнубакка, көлүөнэттэн көлүөнэҕэ тиэрдэн иһэригэр сүдү кылаатын киллэрэрин иһин Саха сирин Национальнай библиотекатын аатыттан Махтал суругу тутта.

«Иллэҥ эрэ буолларбын, ааҕарбын сөбүлүүбүн. Болҕомто ууран маннык үөрүүнү бэлэхтээбиккитигэр махтанабын. Мин ордук кыһалҕалаахтарга көмөлөһө сатыыр сыаллаахпын. Кэлиҥҥи кэмҥэ оҕолорбор ааҕыы аҕыйах», - диэтэ Майя Петровна.

Майя Петровна «Эбээ Маайа» диэн сахалыы ханаал арыйан, саха суруйааччыларын айымньыларын, ону таһынан оҕолорго анаан араас остуоруйалары ааҕан иһитиннэрэр.

Эбээ Маайа ааҕыыларын СӨ Национальнай библиотекатын Электроннай библиотекатыгар истиэххэ сөп. Ааҕыылар саха литературатын төрүттээччилэр, норуодунай суруйааччылар, араас кэминээҕи суруйааччылар айымньылара уонна остуоруйалар диэн араарыллан кэллиэксийэҕэ киирбиттэрэ.

Майя Петровна 1957 сыллаахха ыам ыйын 2 күнүгэр Чурапчы улууһун Бахсы нэһилиэгэр төрөөбүтэ. 1979 сыллаахха Дьокуускай куораттааҕы культурнай-сырдатар училищены, онтон 1986 сыллаахха Улан -Удэ куоракка култуура институтун үөрэнэн бүтэрэн баран, Ньурбатааҕы судаарыстыбаннай көһө сылдьар тыйаатырга артыыһынан үлэлии киирбитэ.

Оонньообут оруоллара:

Айта - «Мас холбука» И. Семенов; Нараҕана - «Лоокуут уонна Ньургуһун» Т. Сметанин; Балыксыт ойоҕо - «Уот Дьулустаан» В. Гаврильева; Буор кут - «Кир» Ю. Макаров; Тыаhааны - «Тыгын Дьанхалаах дьолуо» И. Гоголев - Кындыл; Айыы Куо - «Кыһыл ойуун» П. Ойуунускай; Матаһыйар Маайа - «Акаары дьахтар» В. Гаврильева; Айыы удаҕанас- «Буура Дохсун» Эрилик Эристиин; Ньукэн - «Күкүр Уус» С. Омоллоон; Автора оруола – «Сүүһүн туолбут эмээхсин ырыата» А. Кулаковскай; Иччи - «Иччилээх балаҕан» И. А. Дмитриев - Сиэн Чолбодук; Киристиин - «Похоруонка» И. А. Дмитриев - Сиэн Чолбодук; Филумена Мартурано - «Үрүҥ көмүс лыах» Эдуардо де Филиппо уо. д. а. Испэктээктэри таһынан «Ситим» уонна «Кырдьыбат сүрэх – дьол» диэн уус-уран киинэлэргэ уһуллубута.

Режиссерскай үлэлэрэ:

Испэктээктэр:
«Халлаан сырдыахтаах» И. А. Дмитриев – Сиэн Чолбодук; «Өстөөх ханна саһан сылдьар» И. Егоров, Н. Семенов, Н.К. Докторов-Быычырдаан;
Кылгас метражтаах киинэлэр: «Арай биирдэ…», «Хоноһо».