Бүгүҥҥүттэн, тохсунньу 15 күнүттэн, Николай Неустроев “Тиэтэйбит” комедиятынан уһуллубут саҥа киинэ улахан экраҥҥа тахсар. Киинэни суруйааччы Николай Неустроев төрөөбүтэ 120 сылыгар анаан бу сайын Тааттаҕа уһуллулар. Режиссер – Роман Дорофеев, сүрүн оруоллары Иннокентий Луковцев, Степан Порядин, Кирилл Семенов, Изабелла Николаева, Василина Баранова, Ньургуйаана Шадрина, Сайаан Татаринов, Егор Ощепков, Петр Садовников, Анна Флегонтовна, Павел Ченянов, Игорь Говоров, Елизавета Далбараева, Геннадий Турантаев толордулар. 

“Тиэтэйбит” комедияҕа кэпсэнэринэн, Омуннаах Уйбаан куоракка күүлэйдии сылдьан, дойдутугар ыарыһах кэргэнэ өлбүтүн истэр. Дьиэтигэр төннөн иһэн, билэр кырдьаҕаһыгар Күөс Бүөтүргэ таарыйан ааһар. Күөс Бүөтүр Уйбаан кэргэнэ суох хаалбытын истэн, убайын огдообо ойоҕун сыбааттыыр. Уйбаан үөрүүнү кытта сөбүлэһэр даҕаны, кинини дьиэтигэр туох күүтэрин сэрэйэн да көрбөт.

Николай Неустроев “Тиэтэйбит” айымньытын СӨ Национальнай библиотекатын электроннай библиотекатыгар киирэн эмиэ ааҕыахха сөп.

Саха литературатын төрүттэспиттэртэн биирдэстэрэ Николай Денисович Неустроев 1895 с. ахсынньы 15 күнүгэр Таатта yлyyhyгap төрөөбүтэ. Кини драматург уонна прозаик. Бас­такы нууччалыы кэпсээнэ "Дикая жизнь" 1917 с. бэчээттэммитэ, комедия жанрын төрүттээбитэ. Бастыҥ комедията "Кукаакы Кулуба" 1920 сыллаахха суруллубута. Саха драматическай театра кини суруйбут "Kyhaҕaн тыын" драматынан үлэтин саҕалаабыта (1925 с.). "Балыксыт" кэпсээнэ саха классикaтыгаp киирэр, “Тиэтэйбит” комедиятын 1925 сыллаахха суруйан бүтэрбит.