Ол курдук, саха ускуустубатын, тыйаатырын артыыстара, режиссердара үөскээбит Бахсы нэһилиэгэр Тарас Местников аатынан норуот айымньытын саҥа тутуллуохтаах дьиэтигэр тутуу саҕаламмытынан өйдөбүнньүк бэлиэтэ уурулунна. Үөрүүлээх тэрээһиҥҥэ кыттыбыт СӨ култуураҕа, духуобунай сайдыыга миниистирэ Юрий Куприянов уонча сылы быһа күүтүллүбүт дьиэ 2024 с. үлэҕэ киириэхтээҕин туһунан эттэ. 1000 квадраттаах дьиэни «Стройкомплект» тэрилтэ тутуоҕа.

«Айылгы» Култуура дьиэтигэр А.А. Саввин аатынан устуоруйа уонна этнография Чурапчытааҕы түмэлин үбүлүөйдээх сыла аһылынна. Ем. Ярославскай аатынан Хотугу сир норуоттарын устуоруйатын уонна норуоттарын судаарыстыбаннай холбоһуктаах түмэлин быыстапката дьон-сэргэ болҕомтотун тардыаҕа.

Ону таһынан «Мунхалов планетата» арт-галереяҕа Чурапчы улууһуттан тахсыбыт худуоһунньуктар ыҥырыылаах ыалдьыттарынан буоллулар. Быыстапка аһыллыытынан улуус баһылыгын социальнай боппуруостарга солбуйааччы, СӨ ускуустубатын үтүөлээх диэйэтэлэ Мария Кронникова эҕэрдэлээтэ. СӨ ускуустубатын үтүөлээх диэйэтэлэ, худуоһунньук Александра Иннокентьева-Бочкарева-Сууралдьыма, график-худуоһунньук Иннокентий Попов, ювелир-худуоһунньук Наталья Намын үлэлэрин уһуйаан оҕолоруттан саҕалаан сэргии көрдүлэр.

Дьокуускай куораттан кэлбит суруйааччылар Николай Лугинов, Сэмэн Тумат, Гаврил Андросов, Данил Макеев, Павел Федоров-Сомоҕо, Ольга Янцен, Сардаана Корякина уонна олохтоох ааптардар оскуолалар үөрэнээччилэрин кытта киһи аймах духуобунай сайдыытыгар ааҕыы уонна уус-уран литература оруолун туһунан сэргэх кэпсэтиини таһаардылар.

Ону сэргэ А.П. Гоголев аатынан Оҕо ускуустубатын оскуолатыгар үөрэнэр оҕолорго классическай үҥкүүгэ маастар-клааһы Н. Посельская аатынан балет оскуолатын уһуйааччылара ыыттылар. Салгыы араас былаһааккаларга сэминээрдэр ыытылла тураллар.

Ааптар уонна Семен Жендринскэй хаартыскалара.

https://sakha-sire.ru/churapchyga-kultuura-uskuustuba-literatura-kynnere-sagalannylar/