СӨ Национальнай бибилэтиэкэтэ уонна Саха өйүн-санаатын баайын уонна култууратын сырдатар-чинчийэр киин «Тыл күүһэ. Араатардыыр сатабыл» төрөөбүт тылынан хомоҕойдук саҥарарга, уус-уран айымньыны иҥэрэн ааҕарга үөрэтэр маастар-кылаас тэрийэн ыыттылар.

Бу тэрээһин Ил Дархан граныгар кыайбыт ийэ тылы сайыннарыыга туһуланар бырайыак иитинэн буолла. Үөрэхтээhин бырайыактарын продюсера Семен Посельскай «Төрүт тылбыт урбаан эйгэтигэр суолтата», тыл билимин хандьыдаата Ангелина Кузьмина «Этэр тылы дэгэттиир ньымалар», «Сыл бастыҥ учуутала» күрэх кыайыылааҕа Айаал Мохначевскай «Сахалыы дебакка чахчыга олоҕуруу оруола», дебакка эрчийэр үрдүкү категориялаах учуутал Сардана Сыромятникова «Тыл этэргэ көмө ньымалар» тиэмэлэргэ маастар-кылаастары көрдөрдүлэр.

«Бу маастар кылаастан биһиги үгүһү биллибит, иҥэриннибит. Нууччалыы тиэрминнэри сахатытан туһаныыны, араатардыыр маастарыстыба кистэлэҥнэрин, тыл, этии ситимин кичэллээхтик туттууну биһирээн иһиттибит. Киһи олорорун тухары үөрэнэр, ол ылбыт үөрүйэҕин сыллата туттан сайыннарар, ону тэҥэ бэйэтэ сайдар. Биһиги бу ыытыллар маастар-кылаастарга инникитин да кыттан, бэйэбит билиибитин өссө да хаҥатыахпыт дии саныыбыт. Интэриниэт сайдан турар кэмигэр ыраах сиргэ олорор дьон  үөрүйэхтээх, билиилээх дьонтон куйаар ситиминэн киирэн маннык сатабыллары иҥэринэллэрэ олус бэрт. Салайааччыларга махталбытын тиэрдэбит уонна үлэҕитигэр ситиһиилэри баҕарабыт. Инникитин да маннык маастар-кылаастары ыыта тураарыҥ», - диэн Тылгыны орто оскуолатын үөрэнээччилэрэ Мия Кононова, Лаура Поскачина, Карина Тимофеева санааларын үллэһиннилэр.

Бырайыак иитинэн бу иннинэ «Өбүгэ үөрэҕэ – омук баайа» төрөөбүт тылынан ыстатыйалары уонна уус-уран айымньылары суруйууга оҕолорго, ыччакка аналлаах күрэс чэрчитинэн маастар-кылаас буолбута. Маннык тэрээһин өссө да ыытыллара былааннанар. Аныгыскыларга оҕолор хамаанданан хайдыһан тыл этэргэ, ол эбэтэр сахалыы дебакка күрэхтэһиэхтэрэ.

                                                                                               Мария Татаринова, http://sakhaetigentyla.ru уопсастыбаннай кэрэспэдьиэнэ.