Тэрээһиҥҥэ бу бырайыакка кыттан, быыстапкаларын тэрийбит норуот маастардара, иистэнньэҥнэр кэлэн кытыннылар.

«Алаас уран тарбахтаахтара» бырайыак координатора Людмила Жиркова эппитинэн, быйылгы уонна эһиилги сыллар былааннара номнуо туолан турар. Онон ааҕааччылар, чуолаан кыраайы үөрэтэр, саха тылын уонна култууратын үөрэтэр дьон норуот маастардарын оҥоһуктарын куруук көрүөхтэрэ, сэргиэхтэрэ.

“Бу сыл устата 11 быыстапка турда. Өлүөхүмэттэн, Намтан, Мэҥэ Хаҥаластан, Тааттаттан, Уус Алдантан уо.д.а. маастардар үлэлэрэ турбуттара. Бу сылбыт бастакы быыстапката бэҕэһээ түмүктэммитэ. «Уран ииһим – айар кутум» диэн быыстапкаҕа норуот маастара Мария Атласова – Иис Маарыйа кыбытыктаах тигиилэрэ турбуттара, иистэнньэҥнэргэ бырайыакпытын өйөөбүттэригэр махталбытын тиэрдэбит!”, - диэтэ Людмила Жиркова.

«Алаас уран тарбахтаахтара» бырайыак биир сыллааҕы үлэтин түмпүт электроннай кинигэ тахсаары турар. Онон сотору кэминэн маастардар үлэлэрин Национальнай библиотека сайтыгар көрүөххэ сөп буолуоҕа.

Ону таһынан бүгүҥҥүттэн Сунтаар улууһун Кириэстээх сэлиэнньэтиттэн норуот маастара Христина Моякунова кыбытыылаах тигиилэрэ Национальнай библиотека кыраайы үөрэтэр салаатыгар турда.