СӨ Национальнай библиотекатыгар муус устар 11 күнүгэр «Мүрүйээдэ (Үтүмэн үйэлэр быыстарын сэгэтэн)» диэн Мүрү Эбэ аата аан бастаан сурукка-бичиккэ киирбитэ 355, Бороҕон улууһугар саха оҕотун үөрэхтээһин саҕаламмыта 250, Саха АССР тэриллибитэ 100 сылларын уонна Мүрүгэ Саха сирин норуоттарын VIII спортивнай оонньууларын көрсө анаан тахсыбыт Мүрү Эбэ түҥ былыргы олоҕуттан билиҥҥи кэмҥэ диэри кэпсиир кинигэ сүрэхтэниитэ ааста.

Үбүлүөйдээх сылы көрсө «Мүрүйээдэ» кинигэни хомуйан оҥордо СР культуратын, телевидениетын уонна радионан биэриилэрин туйгуна, республика киинэтин ветерана, Мүрү уонна Суотту нэһилиэктэрин бочуоттаах олохтооҕо, суруналыыс, кыраайы үөрэтээччи Павел Васильевич Пермяков – Тэлэкэ.

Саха сиригэр тэҥнээҕэ суох сөҕүмэр улахан Мүрү алаас үөскээһинин туһунан норуот номоҕуттан, ааспыт үйэлэр ааттаах суоллаах чинчийээччилэрин, учуонайдарын сабаҕалааһыннарыттан саҕалаан билиҥҥи кэмҥэ диэри кэпсиир кинигэ сүрэхтэниитигэр кыттыны ыллылар: “Уус Алдан улууһа” муниципальнай оройуон баһылыга Алексей Васильевич Федотов, «Мүрү нэһилиэгэ» олохтоох бэйэни салайыныы тэриллиитин баһылыга Василий Иванович Аммосов, СӨ Национальнай архыыбын директора Петр Васильевич Румянцев, Саха народнай поэта, Саха Республикатын суруйааччыларын сойууһун бэрэссэдээтэлэ Иван Васильевич Мигалкин, «Полярная звезда» сурунаал редактора Владислав Семенович Доллонов, физико-математическай наука доктора, республикатааҕы лицей директора, Саха Республикатын Государственнай мунньаҕын (Ил Түмэн) V ыҥырыылаах мунньаҕын депутата Иван Иванович Шамаев, С.С.Васильев-Борогонскай аатынан киин библиотека ааҕааччыны кытта үлэлиир отдел сэбиэдиссэйэ Галина Владимировна Аммосова уо.да.а.

Тэрээһини киэргэттилэр: Арчы дьиэтин иһинэн тэриллибит Күн дьоно этнофольклорнай бөлөх, салайааччы Евдокия Павловна - Кылыһах Далбар уонна Константин Иванов.

Тэрийээччилэр библиотекаҕа кинигэ экземплярын бэлэх ууннулар.