Алтынньы 5 күнүгэр СӨ Национальнай библиотекатын Историческай саалатыгар кардиохирург Петр Захаров «Сүрэх хирург хараҕынан» диэн саҥа кинигэтин биһирэмэ ааста.

Тэрээһиҥҥэ СӨ Култуура уонна духуобунай сайдыы миниистирэ Афанасий Ноев, Петр Иванович биир идэлээхтэрэ,«Айар» национальнай кинигэ кыһатын генеральнай дириэктэрин солбуйааччы Валерий Луковцев, аймах-билэ дьоно ыалдьыттаатылар, саҥа кинигэ тахсыбытынан эҕэрдэлээтилэр.

«Петр Иванович, быраас киһи, мэдиссиинэ тиэрминнэрин уу сахалыы тылбаастаан таһаарда. Ону таһынан аан дойду биллиилээх дьонун бэргэн этиилэрин тылбаастаан суруйбута быраас үрдүк култууратын, сахатын тылын хайдах курдук баһылаабытын көрдөрөр. Ону биһиги өйүөх тустаахпыт. Бэлиэтээн эттэххэ, өрөспүүбүлүкэбитигэр кинигэни таһаарыы култуурата эмиэ үрдээн иһэр. Саха сирэ дойду үрдүнэн саамай ааҕар регион быһыытынан биллэрэ кинигэни ааҕыы, кинигэни таһаарыы үрдүк көрдөрүүтүнэн буолар. Киһи доруобуйатын эрдэттэн көрүнүөхтээх, уһун олоҕу олоруохтаах. Маныаха Петр Иванович тус кылаатын киллэрдэ. Саха Өрөспүүбүлүкэтин Маҥнайгы Бэрэсидьиэнэ Михаил Николаев Петр Иванович улуу быраас буоларын билэрэ, үрдүктүк сыаналыыра уонна ытыктыыра», - диэн Афанасий Иванович эҕэрдэ тылларын эттэ.

Санатар буоллахха, ааспыт сылга Сүрэх-тымыр киинэ тутуллан үлэҕэ киирбитэ. Киин тутуллуутугар биир саамай улахан быһаарыылаах түгэнинэн Петр Иванович сүрэҕи көһөрөн олордуута буолбута. Маннык эпэрээссийэ Уһук Илиҥҥэ өссө да оҥоһулла илик.

«Сүрэх хирург хараҕынан» кинигэ 2017 сыллаахха аҕыйах ахсаанынан тахсыбыт уонна бэрт түргэнник тарҕанан бүппүт. Ааҕааччылар көрдөһүүлэринэн уонна Уһук Илиҥҥэ аан маҥнай киһи сүрэҕин көһөрөн олордуу оҥоһуллубута бэһис сылыгар анаан хос бэчээттэннэ. Кинигэ 13 түһүмэхтэн турар, икки тыһыынча экземплярынан таҕыста. Быраас бэйэтин архыыбыттан хаартыскалар, уруһуйдара киирдилэр.

Саха сиригэр сүрэх-тымыр ыарыытын хирургиятын төрүттээбит, элбэх дьону өлөр өлүүттэн өрүһүйбүт сүҥкэн үтүөлээх кардиохирург Петр Захаров кинигэтигэр сүрэх ыарыытын, тымыр эчэйиитин арааһын, үөскүүр сүрүн төрүөтүн, сүрэххэ оҥоһуллар эпэрээссийэ көрүҥүн сиһилии быһаарар, ааҕааччыга сүбэ-ама биэрэр. «Сүрэх хирург хараҕынан» кинигэ «Айар» национальнай кинигэ кыһатыгар бэчээттэнэн таҕыста.

Петр Иванович Захаров — М.Е. Николаев аатынан Мэдиссиинэ национальнай киинин-өрөспүүбүлүкэ 1-гы №дээх балыыһатын сүрэх-тымыр хирургиятын салаатын салайааччыта, мэдиссиинэ билимин доктора, үрдүк квалификациялаах кардиохирург. Петр Иванович В.В. Пекарскай, А.В. Покровскай, В.И. Бураковскай, Ю.Л. Шевченко, Л.А. Бокерия курдук Арассыыйа улуу учуонайдарын кытта алтыһан, кинилэргэ үөрэнэн, Америка, Корея, Европа, Япония клиникаларыгар стажировкаланан, билиитин-көрүүтүн кэҥэтэн, эпэрээссийэлиир дьоҕурун, маастарыстыбатын чочуйбута. Сүүстэн тахса научнай үлэ ааптара, Арассыыйа уонна СӨ үтүөлээх бырааһа.

СӨ Национальнай библиотекатын Медиа киинэ