Бүгүн, атырдьах ыйын 22 күнүгэр, СӨ Национальнай библиотекатыгар Петр Калачев «Учууталым илиитэ» диэн кинигэтэ сүрэхтэннэ. Кинигэ РСФСР, Саха АССР үтүөлээх тренерэ Дмитрий Коркин 95 сылыгар ананар.

Кинигэҕэ ааптар суруйбут киирии тыллаах, уопсайа 10 ахтыыта киирбит, маны таһынан Наталья Кычкина «Уһулуччу ураты киһи этэ» диэн «Дьулурҕан» хаһыат 2012 сыл балаҕан ыйын 5 күнүгэр тахсыбыт Дмитрий Петрович огдооботун кытта сэһэргэһиини кытта билсиэххэ сөп. Кинигэҕэ «Хаартыскалар – история кэрэһиттэрэ» диэн араас сыллартан, дьиэ кэргэн архыыбыттан, доҕотторун, үөлээннээхтэрин кытта, эрчиллиилэртэн, араас күрэхтэртэн элбэх хаартыскалар киирдилэр.

«Бу кинигэни Дмитрий Петровичтыын өр алтыспыт чугас киһитэ суруйбута биллэр. Ол аатыгар да баар. Бары кыттыгастаах дьоҥҥо махталбын тиэрдэбин, тустуу сайдыытыгар бу кинигэ өҥөлөөх буолар диэн бэлиэтиэхпин баҕарабын. Быйыл биһиги өрөспүүбүлүкэбитигэр бэлиэ сыл буолар, сотору кэминэн Дмитрий Коркин 95 сылын, физкультура хамсааһына тэриллибитэ 100 сылын бэлиэтиэхпит. Анал хамыыһыйа тэриллэн, элбэх үлэ бара турар. Балаҕан ыйыгар улахан турнир, билим кэмпириэнсийэ ыытыллыахтаах. Дмитрий Коркин олоҕо, улахан педагог, новатор, тренер быһыытынан киллэрбит методикалара, кини үлэтэ дириҥник үөрэтиллиэхтээх», - диэтэ успуорт миниистирин бастакы солбуйааччыта Александр Бугаев.

«Учууталым илиитэ» кинигэ ааптара Петр Николаевич Калачев - уһулуччулаах тренер Дмитрий Петрович Коркин бастакы иитиллээччилэриттэн биирдэстэрэ, ССРС спордун маастара, РСФСР норуотун үөрэҕириитин туйгуна, СӨ үөрэҕириитин үтүөлээх үлэһитэ. Петр Николаевич учууталын курдук эмиэ нуучча тылын үөрэхтээҕэ. Кинигэҕэ Дмитрий Коркин, тустуу эрэ туһунан буолбакка, Саха сиригэр сэрии кэминээҕи ыарахан олох, сэриигэ тулаайах хаалбыт оҕолорго интернат оскуола көмөтө, оҕолор тугу үлэлээбиттэрэ эмиэ киирбит.

«Петр Калачев кинигэтэ норуокка, хас биирдии ааҕааччыга тиийимтиэ гына суруллубут. Олоҕу, дьоҥҥо-сэргэҕэ сыһыаны, быһыыны-майгыны бары өттүттэн арыйар. Коркин олоҕо наһаа ыарахан, успуорт да өттүгэр моһоло элбэх этэ. Баҕаран туран оҥорбут дьыалатын ааҕан, нуучча тылын учуутала буоларын билэн, дьикти айылгылаах дьон баар эбит диэн ааҕааччы өйдүө. Спортсмен олоҕун көрдөрөр уустук. Учуутал илиитэ баар буолан, биллэр, уһулуччулаах дьоммут таҕыстахтара», - диэтэ ХИФУ профессора, тыл үөрэҕин билимин дуоктара Варвара Окорокова.

«Учууталым илиитэ» кинигэ быйыл Дьокуускай куорат «Сайдам» кинигэ кыһатыгар 500 ахсаанынан бэчээттэнэн таҕыста. Кинигэ тас ойуутугар ССРС норуодунай худуоһунньуга Афанасий Осипов «ССРС үтүөлээх тренерэ Д.П. Коркин үөрэнээччилэрин кытта» диэн уруһуйа туһаныллыбыт.

Кэлин сирэйдэргэ кинигэ ааптара Петр Калачев туһунан суруллар, Кинигэ ааҕааччы киэҥ араҥатыгар ананар.