СӨ Национальнай библиотекатын пуондатын сэдэх нуоталар хаҥаттылар. СӨ норуодунай уонна үтүөлээх артыыһа Мария Евсеевна Николаева 28 нуотаны бэлэхтээтэ. Бу нуоталары консерваторияҕа үөрэппит учуутала  РСФСР үтүөлээх артыыһа Наталия Дмитриевна Болотина үөрэххэр да, үлэҕэр да туһаныаҥ диэн биэрбит.

Наталия Дмитриевна кэргэнэ - РСФСР үтүөлээх артыыһа Павел Петрович Болотин. Онон бу сэдэх нуоталарга Павел Болотин илии баттааһынын булуохпутун сөп. Нуоталар 1866 сылтан ыла бааллар. 

Мария Евсеевна Николаева 1936 сыллаахха бэс ыйын 5 күнүгэр Үөһээ Бүлүү Өргүөтүгэр төрөөбүт. Художественнай музыкальнай училищены бүтэрэн, 1962 сыллаахха Ленинградтааҕы Н. Римскэй-Корсаков аатынан консерваторияҕа үөрэнэ киирбит.

Ырыаһыт саха сыанатыгар 30-тан тахса араас дьахтар уобарастарын көрдөрбүтэ — Микаэла («Кармен»), Татьяна («Евгений Онегин»), Иоланта, Ярославна («Князь Игорь»), Лиза («Пиковая дама»), Чио-Чио-сан уо.д.а. Саха композитордарын испэктээктэригэр эмиэ оонньообута. Москва, Новосибирскай, Башкирия, Красноярскай кыраай уонна Хакасия, Амурскай уонна Хабаровскай кыраайдарга, Чита уонна Иркутскай уобаластарыгар гостуруоллаабыта.

1980 сыллаахха А. Е. Ильинаны кытта Мария Николаева Красноярскай оператын тыйаатырыгар «Князь Игорь» испэктээккэ кыттарга ыҥырыллыбыта.

Наталья Дмитриевна Болотина - Ленинградтааҕы опера тыйаатырын солистката, РСФСР үтүөлээх артыыската, консерватория уһуйааччыта. Кини үөрэнээчилэрэ дойду опера тыйаатырдарыгар солистыыллар. Кэргэнэ - Павел Петрович Болотин - Опера уонна балет академическай тыйаатырын солиһа, 20-с сылларга филармонияҕа ыллаабыт.