Ньурба Убайааныгар саҥа бибилэтиэкэ аһылынна
Бүгүн Ньурба куоратыгар өссө биир үөрүүлээх түгэн тосхойдо. Элбэх дьон түөлбэлээн олорор Убайаан микро-оройуонугар саҥа бибилэтиэкэ дьиэтэ аанын тэлэччи аста.
29.02.2020
![WhatsApp-Image-2020-02-28-at-16.37.27.jpg WhatsApp-Image-2020-02-28-at-16.37.27.jpg](/upload/medialibrary/83d/WhatsApp-Image-2020-02-28-at-16.37.27.jpg)
Сахалыы сиэри-туому норуот биллиилээх эмчитэ, алгысчыта Алиса Иннокентьева ситэрдэ.
Саҥа бибилэтиэкэҕэ кырачаан оскуола үөрэнээччитэ Саша Васильев бибилэтиэкэ туһунан чобуотук-сэргэхтик тыл этэн сэргэхситтэ.
Улуус баһылыга Алексей Иннокентьев истиҥник эҕэрдэлээн туран, үтүө тыллаах Эҕэрдэ суругу улуустааҕы кииннэммит бибилэтиэкэ ситимин дириэктэрэ Анна Багмекка туттарда. Ньурба улууһугар отчуоттуу сылдьар СӨ Бырабыыталыстыбатын оробуочай бөлөҕүн чилиэннэрэ – Ил Түмэн сис кэмитиэтин бэрэссэдээтэлэ Владимир Прокопьев, биир дойдулаахпыт – СӨ баайга-дуолга уонна сиргэ сыһыаннаһыыларыгар миниистирэ Евгения Григорьева, улуустааҕы култуура департаменын салайааччыта Розалия Тихонова, “Кыталык” КД дириэктэрэ Мария Куличкина уонна да атыттар эҕэрдэ, махтал истиҥ тылларын анаатылар, бэлэх-туһах туттардылар.
Бу иннинэ Убайааҥҥа мелиорация тэрилтэтин биир хоһугар кыбыллан олорбут бибилэтиэкэ анал дьиэлэнэн, үлэһиттэр уонна улуустааҕы кииннэммит бибилэтиэкэ ситимин дириэктэрэ Анна Багмет үөрүүлэрэ улахан. Кинилэргэ бу бэртээхэй саҥа дьиэни куонкурус түмүгүнэн “Гарант-Строй” ХЭТ (гендириэктэр Осип Николаев) тутан дьэндьэтэн таһаарда. Эмиэ манна бу тэрилтэ ааспыт сылга спорт комплексын саҥа дьиэтин тутан үлэҕэ киллэрбитэ. Онон Убайаан микро-оройуонун олохтоохторо эт-хаан, билии-көрүү өттүнэн сайдалларыгар табыгастаах усулуобуйа тэрилиннэ.
Ааптар: Геннадий Антонов.
Uluus.media
Рубрики