Киэҥ эйгэ ааҕааччыга анаммыт билим хабааннаах кинигэҕэ Василий Попов сүүрбэ сыллаах археологическай уонна этнографическай үлэтигэр олоҕуран, былыргы сахалар көмүүлэрин көрдүүр-булар ньымалары ырытан суруйар. Өссө билим эйгэтигэр тиһиллэ илик саха XV-XVIII үйэтээҕи көмүүлэр ис мастарын, сиэрдэри-туомнары бэлиэтиир. Салгыы, археологическай чахчыларга олоҕуран, саха палеоэтнографиятыгар саҥа быһаарыылар, өйдөбүллэр бэриллэллэр, түмүккэ Саха сиригэр орто үйэлэри археологическай чинчийии кыһалҕаларын ыйар. 

Кинигэ анал идэлээхтэргэ: археологтарга, этнографтарга ананар. Кыраайы үөрэтээччилэр, саха төрүт култууратын билиэн баҕалаахтар эмиэ кэрэхсээн ааҕыахтара.

Василий Васильевич Попов Ем. Ярославскай аатынан Саха судаарыстыбаннай түмэлигэр үлэлиир. Түҥ былыргы саха култууратын чинчийиинэн устудьуон эрдэҕиттэн дьарыктанар.

2002-2020 сс. саха-французскай археологическай-этнографическай экспедицияҕа кыттыбыта. Үгүс сыллааҕы үлэтин түмүгэр, сахалар сүрүн дьарыктарынан сиэттэрэн, чинчийэр, көрдүүр үлэҕэ бэйэтин ньыматын оҥорбута. Кини көрдүүр ньыматын археологическай чинчийиилэргэ туһанар буолбуттара. 
  
«20 сыл усталаах экспедиция» диэн кинигэни сотору кэминэн библиотекаҕа ааҕыахха сөп буолуоҕа.