Ойуунускай төрөөбүтэ 130 сылыгар аналлаах «Чолбон: өй күрэһэ» оонньуу ыытылынна
![WhatsApp Image 2023-11-10 at 10.54.56.jpeg WhatsApp Image 2023-11-10 at 10.54.56.jpeg](/upload/medialibrary/132/WhatsApp%20Image%202023-11-10%20at%2010.54.56.jpeg)
Норуотун сарсыҥҥыта сардаҥалаах, кэнэҕэскитэ кэнчээрилээх буоларыгар олоҕун анаабыт саха духуобунай лидерэ, уһулуччулаах государственнай деятелэ, суруйааччы, учуонай Платон Алексеевич Ойуунускай төрөөбүтэ 130 сылыгар аналлаах «Чолбон: өй күрэһэ» оонньуу сэтинньи 9 күнүгэр СӨ Национальнай библиотекатыгар буолан ааста.
Платон Алексеевич сиэн балта Е.В. Слепцова-Куорсуннаах эппитинии «түҥкэтэх үйэҕэ оччотооҕу ыар тутулу булгуруйбат модун санаатынан, сахалыы өһөс майгытынан, туохтан да тоһуттубат илбистээх тылынан, кыра-хара бүттүүн киһи быраабын ылынарын хорсуннук туруулаһан, норуот үйэ тухары ыраламмыт көҥүлүн, сырдыгы, сайдыыны, им балайга муммут хараҕын арыйан, батталлаах олох мууһурбут модьоҕотун тоҕо сүргэйэн, самнары баттаан турбут намыһах өһүөтүн үлтү сынньан урусхаллаан, бэйэтин сирин бас билэн олороругар олоҕун анаабыт» Былатыан Ойуунускай олоҕун, айар үлэтин билиигэ күрэс саха тыллаах кырдьаҕас «Чолбон» сурунаалга араас кэми кэрэһилиир ыстатыйаларга олоҕурбут ыйытыыларынан барда. Кыттааччылар библиотека туруорбут улуу киһибит айар үлэтин араас кэрдиис кэмин арыйар кинигэ быыстапкатын кытта билистилэр.
Бу оонньууга кыайыылаах аатын Дьокуускай куорат 1 №-дээх орто оскуолатын учууталларын хамаандата ылла. Санатар буолахха, кинилэр Учуутал күнүгэр анаммыт оонньууга бастаабыттара, онон «Чолбон: өй күрэһэ» оонньуу икки төгүллээх кыайыылаҕынан буоллулар. Иккис миэстэни учууталлартан биир очконан хаалан библиотека ааҕааччылара ыллылар. Медик идэлээх дьүөгэлиилэр Ойуунускай олоҕун олус үчүгэйдик билэллэринэн сөхтөрдүлэр. Үһүс миэстэни Хотугулуу-Илиҥҥи федеральнай университет хотугулуу-илиҥҥи норуоттар тылларын уонна култуураларын институтун литература салаатын устудьуоннара ыллылар.
Түмүккэ нарколог быраас Наталья Слепцова оҕо сылдьан оскуолаҕа хайдах курдук ылларан Ойуунускай хоһоонун үөрэппитин, улуу киһини хаайбыттарын туһунан сураҕы соһуйа ылыммытын, төһө да сыллар аасталлар айылҕа кэрэ көстүүтүн көрдөҕүнэ, туохтан эрэ олус үөрэ астыннаҕына өйүгэр Платон Алексеевич хомоҕой хоһоонноро киирэн кэлэллэрин кэпсээтэ. Итиэннэ эдэр көлүөнэҕэ Былатыан Ойуунускай айар үлэтин хорутуулаахтык үөрэтэллэригэр баҕа санаатын эттэ.