Норуот маастара Мария Атласова – Иис Маарыйа «Уран ииһим – айар кутум» быыстапката түмүктэннэ
Бүгүн, кулун тутар 3 күнүгэр, СӨ Национальнай библиотекатыгар Уус Алдан улууһун Бороҕон сэлиэнньэтин олохтооҕо, норуот маастара Мария Атласова – Иис Маарыйа «Уран ииһим – айар кутум» диэн быыстапкатын сабыллыыта буолла.
![алаас уран два.jpg алаас уран два.jpg](/upload/medialibrary/964/алаас%20уран%20два.jpg)
Тэрээһиҥҥэ «Алаас уран тарбахтаахтара» бырайыак координатора Людмила Жиркова, СӨ Үөрэҕириитин үтүөлээх үлэһитэ, социологическай наука кандидата Анастасия Божедонова, олоҥхону үөрэтээччи, фольклорист, филологическай наука доктора Василий Илларионов уо.д.а. ыалдьыттаатылар.
Национальнай библиотека Историческай дьиэтигэр Мария Атласова илиинэн таҥас лоскуйдарынан иистэрэ дьон көрүүтүгэр турбуттара.
«Алаас уран тарбахтаахтара» диэн бырайыакпыт лоп курдук биир сылын туолла. Бырайыак биир сыллааҕы үлэтин түмэр буклет тахсыахтаах. Мария Семеновна күүстээх санаалаах, тулуурдаах, олус дьоҕурдаах иистэнньэҥ, онон барыбытыгар үтүө холобур буолар», - диэтэ Людмила Жиркова.
Национальнай библиотекаҕа «Алаас уран тарбахтаахтара» бырайыак иитинэн биир сыл устата тоҕус быыстапканы тэрийэн ыыттылар.
«Библиотекаҕа кэлбит ааҕааччы бу курдук үлэлэри көрөн сэргиир. Төрүт култуураҕа сыһыарарга Мария Семеновна манна өҥөтө улахан», - диэтэ Национальнай библиотека дириэктэрин солбуйааччыта Василий Борисов.
Тэрээһиҥҥэ Мария Семеновнаҕа «Саха сиригэр дьахтар хамсааһыныгар киллэрбит кылаатын иһин» диэн анал бэлиэни туттардылар.
Мария Атласова быыстапкатын кэнниттэн Сунтаар улууһун уран тарбахтааҕа Христина Моякунова үлэлэрэ Национальнай библиотека кыраайы үөрэтэр салаатыгар туруохтара.
Бэлиэтээн эттэххэ, Саха сирин иистэнньэҥнэрэ кыбытыктаах тигиинэн аан дойду таһымнаах араас быыстапкаларга, тэрээһиннэргэ ситиһиилээхтик кытталлар.
![алаас уран.jpg алаас уран.jpg](/upload/medialibrary/d97/алаас%20уран.jpg)
![алаас уран три.jpg алаас уран три.jpg](/upload/medialibrary/f1f/алаас%20уран%20три.jpg)