Бэһис быыстапкаҕа Өлүөхүмэ улууһуттан норуот маастардара эдьиийдии-балыстыы Ия Романовна уонна Яна Романовна Чемпосовалар кыбытыктаах тигии оҥоһуктара турдулар. 



“Ия Романовна уонна Яна Романовна Чемпосовалар олох эдэр саастарыгар күүскэ үлэлээн, норуот маастардара буолбуттара. Билиҥҥэ диэри таһаарыылаахтык айа-тута сылдьаллар. Саха сиригэр, Россияҕа, омук да сирдэригэр быыстапкалара олус ситиһиилээхтик ааһаллар. Биһиги култуурабытын киэҥ сиргэ таһаараллар”, - диэтэ норуот маастара, РФ уопсай үөрэхтээһин бочуоттаах үлэһитэ, култуура туйгуна, “Алаас уран тарбахтаахтара” бырайыак координатора Людмила Жиркова.   

Маны таһынан “Алаас уран тарбахтаахтара” бырайыак иитинэн норуот маастара Семен Черноградскай туос оҥоһуктарын быыстапката, Нам улууһуттан кыл оҥоһуктар, Уус Алдан улууһуттан “Олоҥхо дойдута” экспозиция, Таатта улууһуттан “Алгыс” диэн түмсүү кэлэн, быыстапкаларын туруорбуттара.