Бүгүн, ыам ыйын 19 күнүгэр, П.А. Ойуунускай аатынан литература түмэлигэр Тимофей Сметанин уонна Яков Стручков «Мэхээлэчээн булчут кэпсээннэрэ» диэн айымньыларынан виртуальнай оонньуу сүрэхтэниитэ буолан ааста.

Үөрүүлээх тэрээһиҥҥэ Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Сергей Местников, СӨ Култуураҕа уонна духуобунай сайдыыга миниистирэ Юрий Куприянов, саха норуодунай суруйааччыта, П.А. Ойуунускай аатынан литература түмэлин дириэктэрэ Николай Лугинов, оонньууну оҥорбут «ИТ-ГЕНЕРАТОР» тэрилтэ генеральнай дириэктэрэ Вячеслав Егоров, Тимофей Сметанин кыыһа, РСФСР орто анал үөрэхтээһин үтүөлээх маастара, ССРС орто анал үөрэхтээһин туйгуна Татьяна Сметанина сиэннэрин кытта ыалдьыттаатылар. Ону таһынан Дьокуускай куораттааҕы национальнай гимназия 3 уонна 5 кылаастарын үөрэнээччилэрэ кэлэн, оонньууну тургутан көрдүлэр.

П.А. Ойуунускай аатынан литература түмэлин хаартыската

П.А. Ойуунускай аатынан академическай тыйаатыр артыыһа, саха норуодунай артыыһа Кирилл Семенов «Мэхээлэчээн булчут кэпсээннэрэ» кинигэттэн «Куһу ураҕаһынан да бултуурбут» диэн айымньыны мустубут оҕолорго анаан быһа тардан кэпсиириттэн саҥа виртуальнай оонньуу сүрэхтэниитэ саҕаланна.

Татьяна Сметанина сиэннэрин кытта

«Тыл сайдыытын судаарыстыбаннай бырагырааматын чэрчитинэн үбүлэммит бырайыак сүрэхтэммитинэн эҕэрдэлиибин! Урут үөрэх кинигэтинэн муҥурданар эбит буоллахпытына, билигин олох хаамыыта уларыйан, интэриниэт ситимигэр сыһыаннаах бырайыактары олоххо киллэрэргэ үлэлиибит. Тимофей Сметанин айымньыларын оҕо эрдэхпититтэн ааҕан улааппыт дьоммут. Билэргит курдук, Тимофей Сметанин «Егор Чээрин» киинэтэ бүтүн дойду үрдүнэн тарҕанна. Талааннаах киһи айымньылара хайаан да көлүөнэттэн көлүөнэҕэ тарҕанан бара туруохтаахтар. Кэнчээри ыччаппыт аныгы технологиянан билэн-көрөн, саха төрүт үгэһин – бултааһыны умнубакка, инникитин тарҕата туруохтара диэн баҕа санаалаахпын», - диэтэ Сергей Местников.

Саха суруйааччыларын айымньыларынан виртуальнай оонньуу быһыытынан суруйааччылар Тимофей Сметанин уонна Яков Стручков «Мэхээлэчээн булчут кэпсээннэрэ» айымньыларыгар олоҕуран оҥоһулунна. Манна оонньооччу айымньы геройдарын хамсатан, тобуллаҕас толкуйдаах, сатабыллаах уонна олус омуннаах кусчукка Мэхээлэчээҥҥэ кубулуйар, бэриллибит кэмҥэ ким төһө элбэх куһу ураҕаһынан охсон бултуурга күрэхтэһэллэр. Оонньууну «ИТ-ГЕНЕРАТОР» тэрилтэ оҥорон таһаарда.

«Оҕону киэҥ билиилээх, уһулуччу талааннаах гына иитэр туһугар кинигэни ааҕарга сыһыарабыт. Маныаха аныгы технология эмиэ төһүү күүс буолар. Инники кэскилбитигэр, эһиэхэ, оҕолорго, сахабыт тылын сайыннара, төрүт үгэстэрбитин илдьэ сылдьыҥ диэн баҕа санаабын тиэрдэбин», -диэтэ Юрий Куприянов.

«Тимофей Сметанин айымньыларын бары бэркэ билэбит, күн бүгүҥҥэ диэри үөрэтэбит. Кини айымньылара маҥнай кинигэ буолан тахсаллара, кэнники дойду үрдүнэн биһирэнэр киинэ устар буоллулар. Билигин дьэ үһүс түһүмэҕинэн - саҥа виртуальнай оонньуу буолан таҕыста. Киһи айымньы ис хоһоонугар киирэн, оонньоон барара олус кэрэхсэтэр. Атын суруйааччылар айымньыларынан эмиэ салгыы оонньуу оҥорон иһиэхпит диэн эрэнэбин, бу виртуальнай оонньуу оҕо аймаҕы тарда туруо диэн баҕа санаалаахпын», - диэтэ түмэл дириэктэрэ Николай Лугинов.

«Мэхээлэчээн булчут кэпсээннэрэ» диэн кинигэни Электроннай библиотекаҕа бу сигэнэн ааҕыахха сөп https://new.nlrs.ru/open/10730. 

СӨ Национальнай библиотекатын Медиакиинэ