Бэс ыйын 19 күнүгэр, Олоҥхо ыһыаҕын чэрчитинэн, Үөһээ Бүлүү сэлиэнньэтигэр аҕыс кинигэ сүрэхтэннэ: В.И. Алексеев-Бааһынай Баһылай "Сэмсэ үөрэх", "Аан дайды айыллыыта... Орто дойду олохтонуута", А.Т. Титаров "Хардааччы Бэргэн", Ф.Н. Тимофеев-Биэчэрэ "Түмэн Түүрэй Бухатыыр", "Верхневилюйский улус в печати XVII - начало XXI" библиографическай ыйынньык, Н.С. Александров-Ынта Никиитэ "Көр Буурай", К.Н. Никифоров-Лөкөчөөн "Хабытта Бэргэн Мохсоҕоллой Боотур Күн Эрбийэ" уонна "Үөһээ Бүлүү XX-XXI үйэлэр кирбиилэрин олоҥхолоро". 

Олоҥхо кинигэлэрин уонна 18-с үйэттэн саҕалаан билиҥҥи кэмҥэ диэри бэчээт үлэтин сырдатар библиографическай ыйынньык сүрэхтэниитэ ыһыах Моҕол ураһатыгар Үөһээ Бүлүү улууһун киин библиотеката тэрийиитинэн буолан ааста. 

Аҕыс кинигэ сүрэхтэниититтэн биирдэстэрэ саха биллэр олоҥхоһута, оһуохайдьыт Андрей Титаров “Хардааччы Бэргэн” диэн олоҥхо кинигэтэ буолар. 1986 сыллаахха Россия наукаларын академиятын үлэһиттэрэ Саха сиригэр экспедицияҕа кэлэ сылдьан олоҥхону магнитофоҥҥа суруйан хаалларбыттарын булан, сурукка-бичиккэ түһэрэн, үс тылынан бэчээттэтэн, ааҕааччы киэҥ араҥатыгар таһаардылар. Бу кинигэ тахсарыгар Саха сирин эрэ буолбакка, бүтүн дойду учуонайдара кыттыһан үлэлээбиттэр. Кинигэ ”Наука” кинигэ кыһатын редакциятынан уонна көҕүлээһининэн тахсыбыт. 

“Бүгүн Олоҥхо ыһыаҕар Үөһээ Бүлүүттэн төрүттээх, силистээх-мутуктаах олоҥхоһуттар кинигэлэрин биһирэмэ буола турар. Элбэх тэрээһини ыытан, ыһыахха олус бэлэмнэммиттэр. Холобур, 80-с сылларга магнитофоҥҥа суруллан хаалбыт олоҥхолору сурукка-бичиккэ түһэрэн, сахалыы, нууччалыы, английскайдыы бэчээттээн таһаарбыттара бу билиҥҥи көлүөнэҕэ уонна кэнэҕэски ыччаппытыгар олус туһалаах буолуо дии саныыбын”, - диэтэ Ил Дархан пресс-секретара Афанасий Ноев.

“Хардааччы Бэргэн” кинигэ ойуутугар саха биллэр худуоһунньуга Дьулустан Бойтунов үлэлэспит. Дьулустан Афанасьевич үлэлэрэ урут даҕаны олоҥхо кинигэлэрин киэргэппиттэр, ол курдук "Дьырыбына Дьырылыатта", "Дьулуруйар Ньургун Боотур" онтон да атын олоҥхолорго кини уруһуйдарын булан көрүөххэ сөп.

“Бу кинигэҕэ 15 ойууну оҥордум. Үлэлиирбэр, бэйэм Үөһээ Бүлүү буоларым быһыытынан, сирим-дойдум көмөлөһөр буоллаҕа. Этэҥҥэ, үчүгэйдик таҕыста диэххэ сөп. Хаһан баҕарар ыарахаттар бааллар, маны уруһуйдуу олорон, дойдубун саныыбын. Олоҥхо баай тыла, сүөгэйэ-сүмэтэ киһини сөхтөрөр”. 

Дьон-сэргэ этэринэн, бүгүҥҥү курдук элбэх кинигэ биир киэһэ сүрэхтэниитэ өтөрүнэн ыытылла илик эбит. Онон Олоҥхо ыһыаҕын чэрчитинэн ыытыллыбыт тэрээһиҥҥэ сүүстэн тахса киһи ыалдьыттаата.

    

СӨ Национальнай библиотекатын Медиакиинэ