Софрон Данилов «Норуоппут дьылҕата» кинигэтэ сүрэхтэннэ
Бүгүн, муус устар 19 күнүгэр, СӨ Национальнай библиотекатыгар саха народнай суруйааччыта Софрон Петрович Данилов «Норуоппут дьылҕата» диэн кинигэтэ сүрэхтэннэ.
Суруйааччы бу кинигэтигэр норуотун дьылҕатыгар сыһыаннаах бэлиэтээһиннэрэ, публицистиката киирдилэр. Билиҥҥи ааҕааччы, ордук ыччат, саҥалыы толкуйдууругар туһаайыылаахтар. Расул Гамзатов, Кайсын Кулиев, Олжас Сулейменов курдук аатырбыт суруйааччылар санаалара-оноолоро эмиэ көстөр. Кинигэ Саха АССР 100 сылын көрсө тахсар.
Софрон Петрович кыргыттара - М.К. Аммосов аатынан Хотугулуу-Илиҥҥи федеральнай үнүбэрсиэт профессора, философия билимин дуоктара Вера Софроновна Данилова уонна биология билимин хандьыдаата Любовь Софроновна Данилова кинигэни хомуйан таһаардылар.
Тэрээһиҥҥэ суруйааччы кыыһа Вера Данилова, Горнай улууһун баһылыга Никита Андреев, саха народнай поэта Наталья Харлампьева, саха народнай суруйааччылара Николай Лугинов, Семен Попов-Сэмэн Тумат, Ил Дархан сүбэһитэ Игорь Николаев, «Айар» кинигэ кыһатын дириэктэрин солбуйааччыта Валерий Луковцев, Мытаах нэһилиэгин баһылыга Иван Петров, Мытаах галерея түмэлин дириэктэрэ Артур Егоров ыалдьыттаатылар.