Учуутал ....
Бастакы хардыыны саҕалаан,
Буукубаар көрдөрөн кинилэр,
Барыбыт дууһатын абылаан,
Барҕарыы суолларын астылар.

Учуутал ...
Бастыҥы кэрэни тарҕатар,
Байылыат олоҕу сырдатар,
Барыбыт суолбутун саҕалыыр,
Бараммат билиини бэлэхтиир.

Учуутал ...
Төрөппүт киһибит кэриэтэ,
Туллубат тирэхпит бэлиэтэ.
Тулабыт кинилиин киэргэйэр,
Тапталбыт киниэхэ бигэнэр.

Учуутал ...
Оҕолуу эйэҕэс санааҕар,
Кэскили уруйдуур аналгар
Олуһун махтанан туойабыт,
Кэккэлээн тулаҕар турабыт...

Учуутал ...
Дьылҕаҕын соҕотох бу тылга,
Анааҥҥын киэргэйэр олоҕун...
Дьолу тарҕатан сылтан сылга,
Алгыстан дьонунан байаҥҥын!


05  октября 2017

Улуукан төрүппүн майгылаан
Былыргы дьыллары санатан,
Улахан Эбэни курдааннар
Барыһан тураллар очуостар.

Үйэлэр сахтарын уҥуордаан
Өбүгэм олоҕун көрөбүн,
Үйэлээх санаатын ойуулаан
Таастарга кыспытын сөҕөбүн!

Бу манан очуоһу дабайан
Кый үрдүк хааллааҥҥа тиийдэҕэ,
Сүүһүгэр ытыһын даҕайан
Үйэни курдаттыы көрдөҕө!

Халлааҥҥа харбаһан очуостар
Үөһэттэн одуулуу тураллар,
Инники олохпут тускулун
Билгэлээн көрөллөр оҥкулун.

Баараҕай сүдүгүт дьэндэһэн,
Айыыттан айдарбыт эбиккит.
Саханы Аан дойду үрдүнэн
Аатырдар номоххо киирбиккит!

Бу манна куппутун аһаммыт
Өбүгэ тыыннарын тыынабыт,
Бу баардыы ытыһын тутаммыт
Өрөгөй ырыатын ыллыыбыт!


09 августа 2020

Сэгэриэм, эн эрэ бааргыттан,
Сарсыарда уһуктан үөрэбин.
Аттыгар мэлдьитин буолартан,
Астынан саастарбын умнабын.

Тапталым кырдьыбат сыллартан,
Тостубат, уостубат сааһыран,
Иэйиинэн умайыа кэрэттэн,
Имэҥтэн эдэри эргитэн...

Тумнубат сыырдары сылайан,
Тохтообот алааска сытынан,
Сырдыкка сылааска дьулуһан,
Сыдьаайар уотунан умайан.

Кэрэни кэрэхсээн кэпсиэҕэ,
Үтүөнү үллэстэн үөрүөҕэ,
Күннэри күлүмнээн көрсүөҕэ,
Үрдүккэ үгүстүк көтүөҕэ ...

Сибэкки тылларын санатан,
Тапталым олохпун киэргэтэр,
Санаабын саҥалыы сааһылаан,
Тулабын сааһынан эргитэр ...